Ատրպէյճան կը պատրաստուի իր բողոքը ներկայացնելու CNNի յունական ծառայութեան՝ Արցախի հակամարտութեան մասին պատմող փաստագրական ժապաւէնին վերաբերեալ:
Ատրպէյճանի արտաքին գործոց նախարարութեան մամուլի քարտուղար Հիքմաթ Հաճիեւ յայտնած է, թէ իրենք այս միջազգային լրատուական միջոցին պիտի ներկայացնեն իրենց դժգոհութիւնը՝ «քարոզչական նպատակներ հետապնդող» շարժապատկերին վերաբերեալ, զոր յունական ծառայութիւնը նկարահանած է իբրեւ թէ հայկական կողմին պատուէրով:
CNN Greece լրատուական համացանցային կայանը ներկայացուցած է 27 վայրկեան տեւողութիւն ունեցող վաւերագրական տեսաերիզ մը՝ պատրաստուած լրագրող եւ պատերազմներու առաջին գիծին վրայ գտնուելու միշտ պատրաստ թղթակից Մարիա Քարխիլաքիի եւ նկարահան Էորղոս Ափոսթոլոփուլոսի կողմէ:
Շարժապատկերը կը ներկայացնէ 1991ի ազատագրական շարժումէն սկսեալ Արցախի պատմութիւնը՝ տեսակցութիւններ ունենալով արցախցի երիտասարդներու, Հայաստանի եւ Արցախի կառավարական դէմքերու, զինուորական ղեկավարներու եւ զինուորներու հետ, վկայութիւններ առնելով անոնցմէ, այդ շրջանի պատերազմի օրերուն անոնց ապրումներուն մասին, ինչպէս նաեւ անոնց զգացումներուն եւ խաղաղութեան ակնկալութիւններուն մասին: Ներկայացուած են նաեւ յունական արմատներ ունեցող Արցախի բնակիչներ:
Տեսաերիզը կը ցուցադրէ 2016ի Ապրիլեան քառօրեայ աւերիչ պատերազմի ազդեցութիւնը շրջանի բնակչութեան վրայ:
Դիտել տեսաերիզը`
