29 Սեպտեմբերէն 1 Հոկտեմբեր 2023-ին¸ Յունաստանի Թեմի Առաջնորդ Գերշ. Տ. Գեղամ Ս. Արք. Խաչերեան Այցելեց Թրակիոյ Գոմոթինիի¸ Տիտիմոթիքոյի եւ Օրէսթիատայի համայնքները։
Դպրոցական վերամուտ
Ուրբաթ¸ 29 Սեպտեմբեր 2023-ին¸ Գոմոթինիի համայնքի սրահէն ներս տեղի ունեցաւ Հ.Գ.Խաչի Գոմոթինիի Ս. Մեսրոպ Մաշտոց միօրեայ վարժարանի դասաւանդութիւններու վերամուտի հանդիսութիւնը։ Ս. Գրիգոր Լուսաւորիչ եկեղեցւոյ Թաղային խորհուրդի հրաւէրով¸ Առաջնորդ Սրբազան հայրը ներկայ գտնուեցաւ հանդիսութեան։ Ներկայ էին շրջանի հոգեւոր հովիւ գերպ. Տ. Յովհաննէս Ծ. Վրդ. Սաղտըճեան¸ Արեւ. Մակեդոնիոյ եւ Թրակիոյ հոգեւոր հովիւ արժ. Տ. Դանիէլ Քհնյ. Գալօղլեան¸ Թաղային խորհուրդի ատենապետ պրն. Ստեփան Մաթէոսեան եւ խորհուրդի անդամներ¸ Հ. Գ. Խաչի Գոմոթինիի մասնաճիւղի ատենապետուհի տիկ. Հերմինէ Գույումճեան¸ աշակերտներ եւ ծնողներ։
Հայ Գթութեան Խաչի Շրջանային վարչութեան անդամ եւ միօրեայ վարժարանի դասաւանդութեանց պատասխանատու Տիկ. Ռուզանա Զօհրապեան¸ բացման խօսքով բարի գալուստ մաղթեց Առաջնորդ Սրբազան հօր եւ ներկաներուն¸ հրաւիրելով Սրբազան Հայրը ջրօրհնէքի արարողութիւնը կատարելու։ Ապա¸ աշակերտներ ասմունքեցին։ Թաղային խորհուրդի ատենապետ¸ պրն. Ստեփան Մաթէոսեան իր խօսքը ուղղելով ներկայ ծնոներուն¸ անդրադարձաւ միօրեայ հայկական վարժարանին կարեւոր դերակատարութեան¸ համայնքին կեանքի կենսունակութեան եւ հայկական մթոնոլորտի պահպանման համար¸ որուն պատճառով ալ Թաղային խորհուրդը իր կարելին կ’ընէ նեցուկ կագնելու վարժարանի կարիքներուն։
Աւարտին¸ Առաջնորդ Սրբազան հայրը իր խօսքը ուղղեց աշակերտներուն¸ յայտնելով իր գոհունակութիւնը¸ կրթական վերամուտին նաեւ Գոմոթինի գտնուելուն համար¸ եւ բարի ու արդիւնաւոր¸ ուրախալի դպրոցական տարեշրջան մը մաղթեց իրենց։ Մեկնելով միօրեայ վարժարանի՝ Ս. Մեսրոպ Մաշտոցի անունէն¸ Սրբազան Հայրը պատմական հակիրճ ակնարկ մը ըրաւ¸ հայերէն այբուբէնի գիւտով Հայաստանի տարածքին սկսած հայ դպրոցներու հաստատման եւ անոնց պատմական ազգային դերակատարութեան։ Այդ առիթով¸ Սրբազան Հայրը գնահատեց աշակերտներուն ծնողները¸ որ կը գիտակցին իրենց զաւակներուն հայեցի դաստիարակութեան կարեւորութեան։ Առաջնորդ Սրբազան Հայրը գոհունակութեամբ անդրադարձաւ եւ քաջալերական խօսքերով գնահատեց Գոմոթինիի հայ համայնքին վերջին տարիներուն ցուցաբերած եկեղեցական¸ մշակութային¸ երաժշտական¸ դպրոցական եւ համայնքային բարելաւուած մակարդակի կազմակերպուած աշխոյժ կեանքը¸ թէ համայնքէն ներս եւ թէ պատուաբեր ներկայութիւնը՝ Գոմոթինի քաղաքի մշակութային կեանքէն ներս։ Նման երեւոյթ պատահականութեան արդիւնք չէ¸ այլ՝ արդիւնք է որ հոգեւոր հովիւ Հայր Յովհաննէսին¸ շրջանի քահանայ հոգեւոր հովիւ Տէր Դանիէլին եւ Թաղական խորհուրդի գլխաւորութեամբ¸ իւրաքանչիւր կորիզ¸ իւրաքանչիւր մարմին իր պարտականութիւնը համադրուած եւ գործակցական ոգիով կը կատարէ։ Հանդիսութեան աւարտին¸ բոլոր ներկաները բարձր տրամադրութեամբ ընթրիքի սեղաններու շուրջ շարունակեցին երեկոն։
Այցելութիւն Տիտիմօթիքոյի Մետրոպոլիտին
Շաբաթ¸ 30 Սեպտեմբեր 2023-ին կէսօրուան ժամը 12.00-ին¸ Առաջնորդ Սրբազան Հայրը այցելեց Տիտիմոթիքոյի Մետրոպոլիտին՝ Տ. Տամասքինոսին։ Այցելութեան ներկայ եղան Արժ. Տ. Դանիէլ Քհնյ. Գալողլեան եւ Տիտիմոթիքոյի եւ Օրէսթիատայի Ս. Գէորգ եկեղեցւոյ Թաղային խորհուրդի ատենապետ՝ պրն. Գէորգ Թորոսեան։ Մետրոպոլիտը ողջունեց Սրբազան Հօր այցելութիւնը¸ որ ամէն անգամ ալ փոխադարձ յարգանքի եւ սիրալիր մթնոլորտի մէջ տեղի կ’ունենայ։ Ինչպէս ամէն անգամ¸ այցելութիւնը հոգեշահ առիթ կը հանդիսանայ կրօնական եւ եկեղեցական հարցերու մասին անդրադառնալու։
Օրէսթիատայի ազգապատկան սրահի «ԱՆԱՅԻՍ ԳԱՍԱՊԵԱՆ» անուանում
Շաբաթ¸ 30 Սեպտեմբերի երեկոյեան ժամը 7-ին¸ Տիտիմոթիքոյի եւ Օրէսթիատայի Թաղական խորհուրդի նախաձեռնութեամբ եւ Ազգային վարչութեան տնօրինումով¸ Առաջնորդ Սրբազան Հօր նախագահութեամբ տեղի ունեցաւ Օրէսթիատայի համայնքի Հ.Գ.Խաչի միօրեայ վարժարանի ազգաաատկան սրահի անուանունմը ԱՆԱՅԻՍ ԳԱՍԱՊԵԱՆի անունով։ Հանդիսութեան ներկայ էին Հայաստանի հանրապետութեան Յունաստանի պատուոյ հիւպատոս պրն. Սարգիս Տանկազեան¸ արժ. Տ. Դանիէլ Քհնյ. Գալօղլեան¸ Թաղային խորհուրդի ատենապետը Գէորգ Թորոսեան եւ անդամներ¸ Անայիս Գասապեանի դուստրը տիկ. Սեսիլ Գասապեան-Մարուքեան¸ Տիտիմոթիքոյի քաղաքապետը¸ նահանգապետարանի խորհրդատու անդամ մը¸ աշակերտներու ծնողներ¸ Անայիս Գասապեանի յոյն եւ հայ բարեկամներ եւ Օրէսթիատաբնակ հայորդիներ։ Թաղային խորհուրդի անունով տիկ. Զապէլ բացման խօսքով բարի գալուստ մաղթեց ներկաներուն։ Խօսք առին¸ պրն. Սարգիս Տանկազեան¸ պրն. քաղաքապետը¸ նահանգապետարանի խորհրդական անդամը¸ որոնք նաեւ անդրադարձան տիկին Անայիս Գասապեանի վաստակին¸ որ իբրեւ դաշնակի ուսուցչուհի¸ անհատական ճիգերով առաջատարը եղաւ եւ մեծապէս նպաստեց Օրէսթիատայի մէջ առ հասարակ երաժշտական կրթութիւն եւ ճաշակ ջամբել յոյն, թէ հայ աշակերտներու։ Աւարտին հրաւիրուեցաւ Առաջնորդ Սրբազան հայրը ջրօրհնէքի արաղութիւնը կատարելու եւ իր խօսքը ուղղելու։
Հայ եւ ապա յոյն ներկաներուն ուղղելով իր խօսքը¸ Սրբազան Հայրը ողջունելով հանդիսութեան նպատակն ու ոգին¸ առաջին հերթին անդրադարձաւ շրջանի հայ նոր սերունդներուն հայեցի կրթութեան անհրաժեշտութեան¸ եւ այդ գծով շրջանի հոգեւոր թէ ազգային պատասխանատուներուն տասնամեակներու անձնուէր ծառայութեան։ Անայիս Գասապեանի եւ իր նմաններուն արժանիքը կը կայանայ անոր մէջ¸ որ Օրէսթիատայի մէջ հայերենի դասաւանդման համար սեփական վայր մը ունենալու մնայուն կերպով հոգը վերցուցին եւ տեսիլքը ունեցան։ Այսօր¸ այս սրահըԱնայիս Գասապեանի անունով կոչելը գնահատական անդրադարձ մըն է գործած ու անցած բոլոր պատասխանատուներու¸ իսկ ներկայի պատասխանատուներուն ալ քաջալերական թելադրանք՝ հայկական նոյն ոգիով եւ նախանձախնդրութեամբ շարունակելու նոր սերունդի փոքրերուն մէջ տպաւորելու հայկական նկարագիրը եւ պատկանելիութեան գիտակցութիւնը։
Աւարտին¸ առաջնորդ Սրբազան հայրը¸ Անայիս Գասպեանի զաւակներ՝ Յովհաննէս Գասապեանի եւ Սեսիլ Գասապեան-Մարուքեանի հետ միասին կատարացին անուանումի բացումը։ Հանդիսութեան յաջորդեց հիւրասիրութիւն։
Ս. Գէորգ եկեղեցւոյ անունակոչութեան տօնակատարութիւն
Կիրակի¸ 1 Հոկտեմբեր 2023-ին առաւօտեան¸ Տիտիմոթիքոյի Ս. Գէորգ եկեղեցւոյ անուանակոչութեան տօնին առթիւ¸ մատուցուեցաւ հանդիսաւոր սուրբ պատարագ եւ մատաղօրհնութիւն։ Սուրբ պատարագի երգեցողութիւնը կատարեցին Գոմոթինիի¸ Ալէքսանտրուպոլսոյ եւ Քսանթիի եկեղեցիներու դպրուհիներ¸ ղեկավարութեամբ արժ. Տ. Դանիէլ Քհնյ. Գալօղլեանի։
Սուրբ պատարագին ներկայ եղան Տիտիմոթիքոյի ազգային երեսփոխանական ժողովի անդամ պրն. Հմայեակ Անտոնեան¸ Ազգային վարչութեան ներկայացուցիչ տիկին Զապէլ Այվազեան¸ Թրակիոյ շրջանի կարգ մը եկեղեցիներու Թաղական խորհուրդի ատենապետներ եւ անդամներ ¸ ինչպէս նաեւ Գավալայէն¸ Քսանթիէն¸ Գոմոթինիէն¸ Ալէքսանտրուպոլսէն եկած ուխտաւորներ եւ Տիտիմոթիքոյի եւ Օրէսթիատայի համայնքի հայորդիներ։ Թաղական խորհուրդի հրաւէով¸ ներկայ եղան նաեւ շրջանի քաղաքապետը¸ զինուորական եւ պետական ապահովութեան ներկայացուցիչներ։
Առաջնորդ Սրբազան Հայրը իր քարոզին մէջ անդրադառնալով Վարագայ խաչի տօնին¸ ըսաւ որ Հայ եկեղեցին Քրիստոսի Խաչափայտին առնչուած համաքրիստոնէական խաչի երեք տօներէն անկախ¸ որպէս չորրորդ տօն ունի Վարագայ խաչի տօնը։ Այս տօնը կը վերաբերի Քրիստոսի Խաչափայտէն մասունքի մը¸ որ 4-րդ դարուն Հռիփսիմէ կոյսը իր հետ Հռոմէն Հայաստան բերած էր եւ Հռիփսիմեանց կոյսերու նահատակութենէն ետք մնացած էր Հայաստան՝ Վարագայ լերան բարձունքին¸ ուր Հռիփսիմէ կոյսը դրած էր ապահովութեան համար։ Ժամանակ մը անյայտացած էր անոր հետքը։ 653 թուականին¸ երկու հայ ճգնաւորներու տեսիլքով յայտնաբերուած էր Վարագայ վանքին մէջ։
Անդրադառնալով Ս. Գէորգի եւ անոր վարքին¸ նշեց որ սուրբերը անոնք են¸ որոնք իրենց հաւատքի ճամբով Խաչի բարոյականին ընդմէջէն ճանչցան յաւիտենական ճշմարտութիւններն ու արժէքները։ Սուրբերը իրենց կեանքով եւ մարտիրոսութեամբ ցոյց տուին երկրաւոր եւ գնայուն արժէքներն ու վայելքները մերժելով կառչած մնալ յաւիտենական արժէքներուն։ Ապա¸ թելադրեց¸ որ մեր հայրերէն մեզի փոխանցուած Քրիստոսի հաւատքը անխախտ պահպանել¸ որով դարերով հայ ժողովուրդը կարողացած է անժամանցելի ազգային արժէքներու ժառանգութիւն ունենալ։
Արցախի վերջին աղիտալի դէպքերուն պատճառով¸ համազգային աղօթքի օրուան առթիւ¸ Սրբազան Հայրը ցաւով անդրադարձաւ պատահած ահաւոր դէպքերուն¸ շեշտելով¸ որ պատմութենէն պէտք է ուսանիլ¸ թէ հայրենիքներ միայն հայրենասիրութեամբ կը պահուին։
Սուրբ պատարագի աւարտին կատարուեցաւ հոգեհանգստեան արարողութիւն Արցախի վերջին պատերազմական գործողութիւններուն զոհուած նահատակներու հոգիներուն համար¸ ինչպէս նաեւ յատուկ աղօթք հիւանդներու շուտափոյթ ապաքինման եւ ընդհանրապէս տագնապի մէջ գտնուող մեր զաւակներուն բարօրութեան համար: Սրբազան Հայրը նաեւ օրհնեց մատաղը¸ որ տօնի տօնակատարութեան նախօրեակին¸ Շաբաթ օր շրջանի տիկիններ եկեղեցւոյ շրջափակին մէջ պատրաստած էին։
Թաղական Խորհուրդի հրաւէրով¸ Առաջնորդ Սրբազան Հայրն¸ Թրակիոյ շրջանի հոգեւոր հովիւը եւ ուխտաւորներ Փարատիսոս ճաշարանին մէջ սեղանակից եղան։ Թաղական Խորհուրդի բարի գալուստի խօսքէն ետք¸ Սրբազան հայրն իր սրտի խօսքը ուղղելով ներկայներուն¸ շեշտեց կարեւորութիւնը այս տօնակատարութիւններուն¸ որոնց շնորհիւ Թրակիոյ շրջանի հայութիւնը դարերով պահած էր իր հաւատքն ու հայկական ինքնութիւնը։ Գնահատեց այլ շրջաններէ եկած հայորդիներուն յանձնառութիւնը եւ մասնակցութիւնը¸ թելադրելով որ պէտք է այս հաւատքն ու յանձնառութիւնը փոխանցել յաջորդ սերունդներուն։
ԹՂԹԱԿԻՑ
