Այսօր, Երեքշաբթի՝ 11 Սեպտեմբեր 2018ին, Առաջին զանգը հնչեց Ֆիքսի «Ազնիւ եւ Ժիրայր Ճէնազեան» միջնակարգի, «Լեւոն եւ Սոֆիա Յակոբեան» եւ Գոքինիոյ «Զաւարեան» վարժարաններէն ներս: Ամառուան արձակուրդէն ետք դարձեալ աշակերտներ, ուսուցիչներ եւ ծնողներ համախմբուեցան մեր ազգային վարժարաններէն ներս, հանդիպելով իրենց ընկերներուն եւ պատմելով մէկը միւսին՝ ամարուան, անհոգ օրերը:
Վարժարաններու բացման արարողութեանց ներկայ գտնուեցան Յունահայոց Ազգային Վարչութեան եւ Ուսումնական Խորհուրդի անդամներ, Հ. Կ. Խաչի Շրջանային եւ տեղական Վարչութեանց ներկայացուցիչներ, Ծնողական Միութիւններու եւ գաղութին մէջ գործող բոլոր միութիւններու վարչութեանց եւ թաղականութիւններու ներկայացուցիչներ, ծնողներ եւ հրաւիրեալներ։
Ֆիքսի մէջ, առաւօտեան ժամը 9ին, ջրօրհնէքի արարողութիւնը կատարեց Յունահայոց Թեմի Առաջնորդ Գեղամ Արք. Խաչերեան, Հրայր Աւ. Քհնյ. Նիկոլեան եւ շրջանի հոգեւոր հովիւ Նարեկ Քհնյ. Շահինեան։ Առաջնորդը իր օրհնութիւնը եւ բարի վերամուտի մաղթանքները փոխանցեց աշակերտներուն, ուսուցչական կազմին եւ ծնողներուն՝ կրթական տարեշրջանի բացման առիթով։
Յունահայոց Ազգային Վարչութեան կողմէ՝ իր խօսքը ուղղեց ատենապետ պրն. Պօղոս Չոլաքեան, բարի յաջողութիւն մաղթելով բոլորին արդիւնաբեր կրթական տարեշրջանի բացման առիթով:
Իրենց խօսքը եւ թելադրանքները փոխանցեցին միջնակարգի եւ նախակրթարանի տնօրէնները։
Ֆիքսի շրջանի վարժարաններու ջրօրհնէքէն ետք, յաջորդեց Գոքինիոյ «Զաւարեան» վարժարանի ջրօրհնէքը։
Առաւօտեան ժամը 10ին, ջրօրհնէքը կատարեց Յունահայոց Թեմի Առաջնորդ Գեղամ Արք. Խաչերեան, Հրայր Աւ. Քհնյ. Նիկոլեան եւ շրջանի հոգեւոր հովիւ Պարէտ Քհնյ. Խաչերեան։ Առաջնորդը իր օրհնութիւնը եւ բարեմաղթանքները փոխանցեց աշակերտներուն, ուսուցչական կազմին եւ ծնողներուն՝ կրթական տարեշրջանին վերամուտին առիթով։
Յունահայոց Ազգային Վարչութեան կողմէ խօսք ուղղեց ատենապետ պրն. Պօղոս Չոլաքեան, որ բարի վերամուտ եւ բարի յաջողութիւն յայտնեց բոլորին՝ մաղթելով, որ 2018-2019 կրթական տարեշրջանը արդիւնաբեր ուսումնական տարի մը ըլլայ։
Աւարտին, վարժարանի տնօրէնուհին իր խօսքը եւ թելադրանքները փոխանցեց աշակերտներուն։
