Չորեքշաբթի՝ 31 Յունուար 2018ի երեկոյեան ժամը 8։30ին, «Զաւարեան» Կեդրոնի «Զաքարեան-Սարաճեան» սրահներուն մէջ, տեղի ունեցաւ Ազգային Վարչութեան ամանորեայ գաթայի հաւաքոյթը։
Իրենց ներկայութեամբ հաւաքոյթը պատուեցին Յունաստանի հայոց թեմակալ առաջնորդ Գեղամ Արք. Խաչերեան, Հ.Հ. դեսպան պրն. Ֆադէյ Չարչօղլեան ու դեսպանութեան մօտ ռազմական կցորդը։
Ներկայ էին աւետարանական համայնքի հովուապետ Վերապատուելի Վիգէն Չոլաքեան, Կրօնական Դասը, միութեանց, թաղականութեանց եւ տիկնանց մարմիններու ներկայացուցիչներ, Ազգ. Վարչութեան կողքին գործող խորհուրդներու կազմերը, վարժարաններու տնօրէնները եւ ուսուցչական կազմերը, Ազգային թեմական ժողովի երեսփոխաններ եւ Ազգային Վարչութեան կազմին մէջ գործած վաստակաւորներ։
Բացման խօսքին մէջ օրուան հանդիսավար տիկ. Արաքսի Աբէլեան-Գոլանեան բարի գալուստ մաղթեց ներկաներուն՝ շնորհաւորելով նոր տարին եւ մաղթելով, որ գաղութի բոլոր կառոյցներուն ներկայացուցիչները, ամէն մէկը իր գործունէութեան դաշտին մէջ, լաւագոյն արդիւնքի հասցնէ տարած աշխատանքը։
Ան նշեց, որ Ազգ. Վարչութիւնը հազիւ վեց ամսուան նստաշրջան մը բոլորած է եւ անդուլ աշխատանք կը տանի իրեն վստահուած առաքելութիւնը յաջող արդիւնքի հասցնելու բոլոր մարզերէն ներս։
Նորընտիր թեմակալ առաջնորդը՝ Գեղամ Արք. Խաչերեան, գործուն ներկայութիւն է ազգային եւ եկեղեցական շրջապատէն ներս։ Ազգ. Վարչութիւնը, ներքին իմաստով, կը փորձէ լաւագոյն ձեւով համադրել ազգային կեանքին առընչուող աշխատանքները, սերտ յարաբերական եւ գործակցական կապեր պահելով թաղականութեանց հետ։
Հելլէն իշխանութիւններու մօտ պատշաճ ձեւով կը ներկայացնէ յունահայ գաղութը։ Նոյնպէս ներկայութիւն ունեցաւ Հայաստան-սփիւռք վեցերորդ համաժողովին, Երեւանի մէջ։
Նոյնպէս՝ երկու պատգամաւորներով մասնակցեցաւ Անթիլիասի մէջ գումարուած Կիլիկիոյ Կաթողիկոսութեան Ազգային Կեդրոնական Ժողովին։
Մաղթեց, որ նոր տարուան ընթացքին իրարհասկացողութեան, փոխ-ըմբռնման եւ գործակցութեան ոգի տիրէ գաղութի բոլոր մարմիններուն եւ կառոյցներուն միջեւ, լաւագոյն ձեւով արգասաւորելու համար տարուած աշխատանքները։
Ապա՝ խօսքը տուաւ Ազգ. Վարչութեան ատենապետ պրն. Պօղոս Չոլաքեանի, որ տարուած աշխատանքներուն շուրջ ընդհանուր զեկոյց մը ներկայացուց։
Ան նախ շեշտեց Սրբազան Հօր ներկայութիւնը ու գործակցութեան ոգին, որ կը տիրէ Ազգ. Վարչութեան կազմէն ներս։ Ապա՝ անդրադարձաւ Ազգ. Վարչութեան եւ անոր յառաջացուցած խորհուրդներու գործունէութեան։
Ազգ. Վարչոթեան գլխաւոր իրագործումներէն եղած է Հ. Կ. Խաչի Ֆիքսի «Լ. եւ Ս. Յակոբեան» վարժարանի շէնքային կառոյցի նորոգութիւնը, որ հրամայական անհրաժեշտութիւն էր, որովհետեւ աւելի քան 50 տարուան գործածութիւնը յառաջացուցած էր մաշումներ։ Նորոգութիւնը յաջողեցաւ շնորհիւ բարերար Արթին Գալուստեանի մեծագումար կտակին։ Յարգելով իր յիշատակը՝ Հ. Կ. Խաչի հետ խորհրդակցաբար՝ որոշուեցաւ Ֆիքսի շրջանի մանկապարտէզը անուանել «Արթին Գալուստեան»։ Այս առթիւ կազմակերպուեցաւ անուանակոչման հանդիսութիւն։
Սրբազան Հայրը եւ Ազգ. Վարչութիւնը ներկայ գտնուեցան Հիւսիսային Յունաստանի, Թեսաղոնիկէի, Սէրէսի, Գոմոթինիի, Ալեքսանտրուպոլսոյ, Տիտիմոթիխոյի եկեղեցիներու տօնակատարութեանց, որոնց ընթացքին առիթը տրուեցաւ կապի մէջ մտնելու տեղւոյն թաղականութեանց եւ ազգայիններուն հետ եւ, երկու առիթով, միջ-թաղային ժողով հրաւիրելու՝ մօտէն իրազեկ դառնալով շրջանի հարցերուն։
Ընդհանրապէս կանոնաւոր հեռաձայնային կապ կը պահուի շրջաններու թաղականութեանց հետ, հերթաբար տեղեակ ըլլալու համար անոնց հարցերուն եւ համապատասխան լուծումներ տալով։
Սրբազան Հայրը ներկայութիւն է Աթէնքի շրջանի բոլոր եկեղեցիներէն ներս՝ նախագահելով եւ ըստ պահանջի պատարագելով եւ իր հայրական պատգամը փոխանցելով։
Տնտեսական Խորհուրդը երկրի տնտեսական ճգնաժամային շրջան մը դիմագրաւելով՝ կը փորձէ հաւասարակշռել թեմի նիւթական վիճակը։
Կալուածային Խորհուրդը իր կարգին հետեւողական աշխատանքի լծուած է՝ լաւագոյն ձեւով մատակարարելու եւ արժեւորելու համար ազգային կալուածները։
Ուսումնական Խորհուրդը կը գործէ համախորհուրդ վարժարաններու տնօրէններուն՝ հոգալով վարժարաններու կարիքները, գործակցաբար Տնտեսական եւ Կալուածային Խորհուրդներուն հետ, անոնց առընչուող հարցերու վերաբերեալ։
Ուսումնական տարեսկիզբէն վարժարանները կը գործեն կանոնաւոր ձեւով եւ լրիւ անձնակազմով։
Վերջին ստացուած լուրը կրթութեան եւ կրօնից նախարարութենէն մեզի կը տեղեկացնէ, որ վերջնական որոշում առնուած է ներկայ տարեշրջանի համար.- Վարժարաններու տասը հայ ուսուցիչները պիտի վճարուին յունական պետութեան կողմէ՝ 12 ամսուան համար։ Առնուած որոշումը արդիւնք է տարուած հետեւողական աշխատանքի եւ յաջորդական յարաբերական կապերու, նախարարութեան պատկան սպասարկութեանց հետ։ Հարցի նկատմամբ, իրաւական գետնի վրայ գործակցելով հմուտ փաստաբանի հետ, գրաւոր ու փաստերու եւ օրէնքներու վրայ հիմնուած ներկայացուեցան մեր պահանջները կրթական նախարարութիւն, ինչ որ մեծապէս սատարեց ստացուած դրական արդիւնքին։
Ազգ. Վարչութիւնը եւ Կրօնական Ժողովը միացեալ հանդիպում մը ունեցած են հասարակաց հարցերու քննարկման համար։ Այսպէ՛ս, օրակարգի հարց դարձան ծուխերու ցանկերը յստակացնելու, ընդհանրապէս ազգայիններու լրիւ ցանկ մը ունենալու պարագանները՝ այս ուղղութեամբ տեղեկութիւններ քաղելով նաեւ յունական վիճակագրական սպասարկութենէն (ΕΘΝΙΚΗ ΣΤΑΤΙΣΤΙΚΗ ΥΠΗΡΕΣΙΑ).
Հանդիպման ընթացքին խօսուեցան նաեւ խորհրդակատարութիւններու վերաբերեալ հարցեր։ Ապա խօսքը տրուեցաւ Հ. Հ. դեսպանին, որ մաղթանքներէն անդին անդրադարձաւ Հ.Հ. դեսպանութիւն-Ազգ. Վարչութիւն անմիջական գործակցութեան անհրաժեշտութեան՝ մատնանշելով, որ անիկա կը գտնուի լաւագոյն մակարդակի վրայ։
Իր օրուան պատգամին մէջ, Թեմակալ Առաջնորդը անդրադարձաւ բոլորին կողմէ կամաւոր աշխատանքին ու տրամադրելիութեան, ներդաշնակ գործելու անհրաժեշտութեան, համագաղութային զօրաշարժի պահանջքին, որոնք անհրաժեշտ նախադրեալներ են գաղութը աշխոյժ ընթացքին մէջ պահելու նպատակին համար։
Իւրաքանչիւրս անհատաբար եւ միութիւնները գործակցաբար, ազգային պատկանելիութեան եւ գիտակցութեան զգացումներով՝ փորձենք մեր ներդրումով սատարել գաղութի, հայութեան եւ հայրենիքի ծառայելու բարձր նպատակին։
Նախքան աւանդական գաթայի կտրումը, Ազգ. Վարչութիւնը որոշած էր յուշատախտակով պատուել եւ հրապարակաւ շնորհաւորել յունահայ գաղութի արժանի զաւակներէն մէկը՝ Արա Ճանիկեանը, որ Քոլոմպիոյ մէջ տեղի ունեցած Զիու-Զիցու մարզաձեւի համաշխարհային ախոյեանութեան մրցումներուն ոսկեայ շքանշանը նուաճեց՝ Յունաստանին եւ յունահայ գաղութին հպարտութեան զգացումներ ներշնչելով։
Յուշատախտակը յանձնեց առաջնորդ Սրբազան Հայրը՝ շնորհաւորելով հայազգի մարզիկը եւ նորանոր յաջողութիւններ մաղթելով անոր։
Հաւաքոյթին հրաւիրուած էր եւ ներկայ գտնուեցաւ յունահայ յայտնի դերասանուհի Խրիսթինա Ալեքսանեան, որ աւարտին խօսք առնելով՝ յայտնեց, թէ ուրախ եւ հպարտ է, որ կը գտնուի հարազատ միջավայրի մէջ — հակառակ որ հայերէն լեզուն չի խօսիր, սակայն զգացումներով եւ ապրումով հայ կը զգայ։ Ինչպէս ծանօթ է, դերասանուհին մեծ յաջողութեամբ թատերական ներկայացումի վերածեց «Անժէլ Գուրթեանի տետրակները» իր մենակատարութեամբ եւ Հայկ Եազըճեանի երաժշտական մեկնաբանութեամբ։
Մեծ յաջողութիւն արձանագրեց եւ յոյն հասարակութեան մօտ լայն արձագանգի եւ ընդունելութեան արժանացաւ հայուհիի մը կեանքը, տառապանքները եւ ապրումները, ցեղասպանութեան եւ Իզմիրի կոտորածի ընթացքին, ինչպէս նաեւ Յունաստան հաստատման պայմանները նկարագրող ներկայացումը։
Հաւաքոյթի վերջաւորութեան Սրբազան Հայրը մաղթանքներով օրհնեց գաթան եւ Ազգ. Վարչութեան ատենապետը բաժնեց կառոյցներու եւ միութեանց ներկայացուցիչներուն։
Յաջորդեց հիւրասիրութիւն, ուր ըստ ընկալեալ սովորութեան, ներկաները առիթը ունեցան առանձնաբար զրուցելու զանազան հարցերու շուրջ։
Թղթակից
