Հայաստանի մէջ Ազգային ժողովի ընտրութիւններուն մէկ ամիս մնացած է: Մարտ 5ին պիտի մեկնարկէ նախընտրական քարոզարշաւը, որու ընթացքին ընտրական գործին մասնակից քաղաքական ուժերը պիտի փորձեն ընտրողներուն ներկայացնել իրենց ծրագիրները եւ երկիրը զարգացնելու տեսլականը: Քարոզարշաւի մեկնարկին ընդառաջ Հ.Հ. կեդրոնական ընտրական յանձնաժողովը (Կ.Ը.Յ.) հրապարակած է Հայաստանի մէջ ընտրելու իրաւունք ունեցող քաղաքացիներուն թիւը` ըստ ընտրական տարածքներու, ցանկը՝ մինչեւ հիմա ընտրութիւնները լուսաբանելու համար հաւատարմագրուած տեղական լրատուամիջոցներու, ինչպէս նաեւ տեղական ու միջազգային դիտորդական առաքելութիւններու, որոնք հաւատարմագրուած են ընտրութիւնները դիտարկելու համար:
Կեդրոնական ընտրական յանձնաժողովի հրապարակած տուեալներուն համաձայն` ընտրութիւններուն մասնակցելու իրաւունք ունի 2 միլիոն 564 հազար 334 քաղաքացի:
Ազգային ժողովի յառաջիկայ ընտրութիւնները լուսաբանելու համար կեդրոնական ընտրական յանձնաժողովին մէջ հաւատարմագրուած է 24 տեղական լրատուամիջոց: Ցարդ հաւատարմագրուած լրատուամիջոցներու ներկայացուցիչներուն թիւը 351 է:
Ընտրութիւններու ընթացքին դիտորդական առաքելութիւն իրականացնելու համար Կ.Ը.Յ.ի մօտ հաւատարմագրուած է 6 տեղական կազմակերպութիւն: Միջազգային դիտորդական կազմակերպութիւններէն Հ.Հ. Ա.Ժ. յառաջիկայ ընտրութիւնները դիտարկելու համար մինչեւ հիմա հաւատարմագրուած է միայն Ե.Ա.Հ.Կ./Ժ.Հ.Մ.Ի.Գ. («Ժողովրդավարական հաստատութիւններու եւ մարդու իրաւունքներու գրասենեակ»): Հայաստանի խորհրդարանական ընտրութիւնները դիտարկելու մասին յայտարարած է նաեւ Ե.Խ.Խ.Վ.ն (Եւրոպայի Խորհուրդի Խորհրդարանական Վեհաժողով):
Քուէարկութեան ելեկտրոնային եղանակով մասնակցելու իրաւունք ունին 877 քաղաքացիներ, որոնց ցանկը նոյնպէս հրապարակած է Հ.Հ. կեդրոնական ընտրական յանձնաժողովը:
Ազգային ժողովի ընտրութիւններուն կը մասնակցին 9 քաղաքական ուժեր, որոնցմէ 5ը՝ կուսակցութիւն, 4ը՝ դաշինք: Ընտրապայքարին մէջ կը մտնեն «Հայաստանի Հանրապետական», «Հայկական վերածնունդ» «Հայ Յեղափոխական Դաշնակցութիւն», «Ազատ Դեմոկրատներ» եւ «Հայաստանի Կոմունիստական» կուսակցութիւնները, ինչպէս նաեւ՝ «Ելք», «Օհանեան-Րաֆֆի-Օսկանեան», «Կոնգրէս-Հ.Ժ.Կ.» եւ «Ծառուկեան» դաշինքները:
