ԳՐԻԳՈՐ ԴԱՒԻԹԵԱՆ
Նոր Սահմանադրութեան ընդունումէն ետք, երբ Հայաստանի իշխանութեան համակարգը նախագահականէն անցաւ խորհրդարանականի, Ապրիլ 2ին տեղի պիտի ունենան առաջին խորհրդարանական ընտրութիւնները, որոնց արդիւնքով պիտի ձեւաւորուի նորընտիր Ազգային Ժողովը, ուր մեծամասնութիւն կազմող ուժը կամ ուժերը հետագային՝ նախագահ Սերժ Սարգսեանի պաշտօնավարման շրջանի աւարտէն ետք, պիտի առաջադրեն նոր կառավարութիւնն ու վարչապետը։ Եւ վարչապետը պիտի ըլլայ երկրի թիւ 1 գործադիր իշխանաւորը՝ իր շուրջ ունենալով նախարարաց խորհուրդը եւ իր թիկունքին՝ խորհրդարանի մեծամասնութիւնը։
Դաշնակցութիւնը միշտ կողմ եղած էր իշխանութեան խորհրդարանական վարչաձեւին, ե՛ւ Առաջին Հանրապետութեան օրերուն, ե՛ւ 1991ի վերանկախացումէն ետք վերջին 25 տարիներու բոլոր հանգրուաններուն։ Ու Սահմանադրութեան փոփոխութիւնը եւ խորհրդարանական իշխանութեան անցումը յաղթանակն են նախ եւ առաջ Դաշնակցութեան գաղափարաբանութեան։ Այս պատճառով է նաեւ, որ Դաշնակցութիւնը բացառիկ նշանակութիւն կու տայ այս ընտրութիւններուն, որովհետեւ այս ընտրութիւններով Դաշնակցութեան հետապնդած ծրագիրները կը թեւակոխեն իրագործման նոր հանգրուան:
Հայաստանի քաղաքական ուժերը արդէն իսկ սկսած են իրենց նախընտրական պատրաստութիւնները, կազմուած են դաշինքներ, որպէսզի միասնաբար կարելիութիւնը ունենան յաղթահարելու խորհրդարան մուտքի պայմանները։ Ընտրութիւններուն մասնակցելու դիմում ներկայացուցած է 9 քաղաքական ուժ. 4ը՝ դաշինքներ — «Ծառուկեան», «Ելք», Հ.Ա.Կ.-Հ.Ժ.Կ., «Օհանեան-Րաֆֆի-Օսկանեան», 5ը՝ կուսակցութիւն — Հայաստանի Հանրապետական Կուսակցութիւն, Հ. Յ. Դաշնակցութիւն, «Հայկական Վերածնունդ», «Ազատ Դեմոկրատներ» եւ Հայաստանի Համայնավար Կուսակցութիւն:
Ուժերու այս դասաւորման մէջ Հայ Յեղափոխական Դաշնակցութիւնը որոշած է առանձինն մասնակցիլ ընտրութիւններուն, որպէս գաղափարական եւ կազմակերպական կուռ կառոյց։
Ընտրացուցակները Կեդրոնական Ընտրական Յանձնախումբին ներկայացնելու վերջին պայմանաժամն էր 16 Փետրուարը։ Միւս քաղաքական ուժերու կարգին, Դաշնակցութիւնն ալ ներկայացուց իր թեկնածուները, ընդհանուր թուով 171 հոգի։ Անոնցմէ 19ը կը ներկայանան համամասնական կարգով։ Դաշնակցութեան ընտրարշաւի պետն է Հ.Յ.Դ. Հայաստանի Գերագոյն Մարմնի ներկայացուցիչ Աղուան Վարդանեան։ Ցուցակը կը գլխաւորէ Հ.Յ.Դ. Բիւրոյի քաղաքական ներկայացուցիչ Արմէն Ռուստամեան, երկրորդ դիրքի վրայ է Աղուան Վարդանեան, եւ շարունակաբար` Դաւիթ Լոքեան, Արմենուհի Կուրղինեան, Լեւոն Մկրտչեան, Արծուիկ Մինասեան, Արմէն Բաբայեան, Ռուզաննա Առաքելեան, Սպարտակ Սէյրանեան, Միքայէլ Մանուկեան եւայլն: Հ.Յ.Դ. ցանկին վրայ կան 45 անկուսակցականներ։
Դաշնակցութեան կարգախօսն է «Նոր սկիզբ, արդար Հայաստան»: Արդար, որովհետեւ Դաշնակցութեան համար արդարութիւնը ամէն ինչի հիմքն է եւ բարձրագոյն արժէք: «Արդար Հայաստանը ազատ Հայաստանն է: Արդար Հայաստանը զարգացող, ուժեղ, ինքնիշխան, բարեկեցիկ, երիտասարդ, իրաւունքի, հոգեւոր մշակոյթի Հայաստանն է։ Դաշնակցութիւնը կ՚ակնկալէ լայնածաւալ քուէ, լուրջ, ծանրակշիռ ներկայացուածութիւն Ազգային Ժողովին մէջ»,- յայտարարեց Հ.Յ.Դ. նախընտրական գրասենեակի պետ Աղուան Վարդանեան՝ ցանկի հրապարակման առթիւ:
«Մենք մեր ծրագիրները ունինք, եւ եթէ ոեւէ մէկը առաջարկէ միացեալ աշխատանք տանիլ այդ ծրագիրներուն համապատասխան, մենք անոնց հետ համագործակցութեան պատրաստ ենք: Այլապէս Դաշնակցութիւնը չի միտիր ինքնանպատակ դաշինքներ ու միաւորումներ հաստատելու` պարզապէս աթոռներ բազմացնելու եւ փառամոլութեան խնդիրներ լուծելու նպատակով»,- հաստատեց Ռուստամեան: Արդարեւ, Դաշնակցութեան մէջ չկան անձնական փառասիրութեամբ առաջնորդուող թեկնածուներ, Դաշնակցութիւնը այն կուսակցութիւնը չէ, որ կազմուած ըլլայ անձի մը շուրջ համախմբուած համակիրներէ։ Դաշնակցութեան կեանքի ու գործելաձեւի հիմքը իր գաղափարաբանութիւնն է, որու անձնուրաց զինուորներն են բոլո՛ր անդամներն ու համակիր բազմութիւնները։
Նախընտրական քարոզարշաւը պաշտօնապէս կը սկսի 5 Մարտին։ Դաշնակցական նախընտրական մեքենան ամէն ճիգ պիտի թափէ հիմնաւորուած բացատրութիւններով ժողովուրդը համոզելու, որ անվերապահօրէն թիկունք կանգնի Դաշնակցութեան ցանկին, որովհետեւ խորհրդարանին մէջ որքան մեծ ըլլայ կուսակցութեան ներկայութիւնը, այնքան աւելի դիւրութեամբ կարելի պիտի ըլլայ յաջողապէս իրագործել Դաշնակցութեան ծրագիրները ի խնդիր ժողովուրդի բարօրութեան, արդարութեան, արդար վաստակի իրաւունքի, արտագաղթի կասեցման, տնտեսական միջին դասակարգի ստեղծման, եւ ի վերջոյ՝ հզօր եւ միացեալ Հայաստանի կերտման ուղղութեամբ։
