Ուրբաթ՝ 11 Ապրիլ 2018ի առաւօտեան ժամը 10։30ին, Թեսաղոնիկէի «Հայաստան» սրահէն ներս, Յունաստանի հայոց թեմի բարեջան առաջնորդ Գեղամ Արք. Խաչերեան, ընկերակցութեամբ Թեսաղոնիկէի Հոգեւոր Հովիւին, հանդիպում մը ունեցաւ Հ.Գ.Խ.ի Մակեդոնիոյ եւ Թրակիոյ Շրջանային եւ Թեսաղոնիկէի «Անի» մասնաճիւղի վարչութիւններուն հետ։
Հ.Գ.Խ.ի Մակեդոնիոյ եւ Թրակիոյ Շրջանային Վարչութեան ատենապետուհի տիկ. Կիւլա Գասապեան ներկայացուց նոր վարչութեանց ընկերուհիները, ապա՝ ողջոյնի եւ բարի գալստեան խօսքեր ուղղեց Առաջնորդ Սրբազան Հօր։
Առաջնորդ Սրբազան Հայրը, նկատի ունենալով իր 10 տարուան փորձառութիւնը Սելանիկի հոգեւոր հովուութեան ծառայութեան դաշտէն ներս, հաստատեց՝ ըսելով.- «Սելանիկը մեր սրտին ու հոգիին մէջ մեծ տեղ եւ դեր ունի, որովհետեւ իր դրուածքով իւրայատուկ է որպէս մէկ ամբողջութիւն, եւ իր կարեւոր ներդրումը կը բերէ համայն յունահայութեան կեանքէն ներս…ե։ Ան յորդորեց շարունակականօրէն պահելու այդ դերակատարութիւնը, յատկապէս ու մասնաւորաբար Հ.Գ.Խ.ի ճամբով։ Այս կապակցութեամբ ան յայտնեց, որ Հ.Օ.Մ.ի ընկերուհիները մեծ աշխատանք կը կատարեն ամէնուրեք, յատկապէս իրենց կնոջական լայն ու տարածուն փորձառութիւնները կիսելով ամբողջ աշխարհի տարածքին։
Թեմակալ Առաջնորդ Սրբազան Հայրը ողջունեց Հ.Գ.Խ.ի հովանաւորութեան տակ գտնուող Թեսաղոնիկէի «Մալաքեան-Գասպարեան «Ծաղկոց» շաբաթօրեայ դպրոցի գործունէութիւնը, յատկապէս Հայաստանէն եկած մեր հայրենակիցներու մասնակցութիւնը եւ շեշտեց՝ մայրենի լեզուն ու ինքնութիւնը պահել անաղարտ ու ջինջ։
Ի վերջոյ, ան իր օրհնութիւնը բաշխեց նոր վարչութեանց անդամուհիներուն եւ մաղթեց, որ նախկիններու թողած աշխատանքով շարունակեն ու ծաւալեն նոր գործունէութիւններ եւ, ժամանակի նոր պայմաններուն համապատասխան, իրերայաջորդ մեր ժողովուրդի նոր սերունդի զաւակներուն կարիքներուն հասնին։
Տեղի ունեցաւ պատճաշ հիւրասիրութիւն։
Թղթակից
