Շաբաթ՝ 24 Նոյեմբեր 2018ի առաւօտեան ժամը 11էն սկսեալ, Յունաստանի հայոց թեմի բարեջան առաջնորդ Գեղամ Արք. Խաչերեան, ընկերակցութեամբ Յունաստանի հայոց թեմի Ազգ. Վարչութեան ատենապետ պրն. Պօղոս Չոլաքեանի, Թեսաղոնիկէի հոգեւոր հովիւ Ստեփանոս Վրդ. Փաշայեանի եւ Թեսաղոնիկէի «Ս. Աստուածածին» եկեղեցւոյ ատենապետ պրն. Արթին Աբրահամեանի, այցելութիւն մը տուին Թեսաղոնիկէի Հ.Գ.Խ.ի Մակեդոնիոյ եւ Թրակիոյ Շրջանային Վարչութեան հովանաւորութիւնը վայելող Թեսաղոնիկէի «Մալաքեան-Գասպարեան» Ծաղկոց շաբաթօրեայ դպրոցը, ուր դրան մուտքին դիմաւորուեցան դպրոցի աշակերտ-աշակերտուհիներու հայկական աւանդական տարազներով եւ աղ ու հացի օրհնութեամբ եւ, ապա, դիմաւորուեցան դպրոցի տնօրէնուհի տիկ. Զապէլ Գալֆայեանին կողմէ։ Ներկայ էին Թեսաղոնիկէի Ազգ. Վարչութեան ներկայացուցիչը, ինչպէս նաեւ Հ.Գ.Խ.ի Մակեդոնիոյ եւ Թրակիոյ Շրջանային Վարչութեան եւ Հ.Գ.Խ.ի Թեսաղոնիկէի «Անի» մասնաճիւղի վարչութեան ընկերուհիները, ինչպէս նաեւ դպրոցի ուսուցչական կազմը։
Առաջնորդ Սրբազան Հայրը իւրաքանչիւր դասարան այցելելով աշակերտ-աշակերտուհիներուն յորդորեց եւ օրհնեց՝ ըսելով.- «Ձեր մայրենի լեզուն մաքուր ու անարատ պահեցէք, սորվեցէք հայ լեզուն ու հայոց պատմութիւնը եւ օգտագործեցէք զանոնք յատկապէս ու մասնաւորաբար օտարներուն ներկայացնելով մեր պատմութիւնն ու մշակոյթը…»։ Իր կարգին, պրն. Ատենապետը եւս քաջալերեց աշակերտ-աշակերտուհիները եւ մաղթեց յարատեւ յաջողութիւն ու բարի աշխատանք։ Ի պատիւ Առաջնորդ Սրբազան Հօր եւ ընկերակից հիւրերուն՝ աշակերտ-աշակերտուհիներուն կողմէ եղան արտասանութիւններ։ Աւարտին, Առաջնորդ Սրբազան Հայրն ու Ազգ. Վարչութեան ատենապետը հետաքրքրուեցան դպրոցէն ներս տարուած աշխատանքներով եւ շնորհաւորեցին դպրոցի տնօրէնութիւնն ու ուսուցչական կազմը, ինչպէս նաեւ՝ Հ.Գ.Խ.ի Մակեդոնիոյ եւ Թրակիոյ Շրջանային Վարչութեան անդամուհիները՝ իրենց նուիրեալ ու կամաւոր աշխատանքին համար։
Ի վերջոյ, ի պատիւ հիւրերուն, տեղի ունեցաւ պատշաճ հիւրասիրութիւն եւ առնուեցաւ յիշատակի խմբանկար։
