Կազմակերպութեամբ «Ս. Յակոբ» եկեղեցւոյս հոգեւոր հովիւին՝ Վահրիճ Վրդ. Ղարախանեանի, Թաղականութեանց եւ Տիկնանց Մարմնին, Կիրակի՝ 24 Յունիս 2018ին, յաւարտ առաւօտեան ժամերգութեան, տեղի ունեցաւ միօրեայ պտոյտ: Մասնակցողները շուրջ 100 հոգիներ էին, որոնց մեծամասնութիւնը կազմած էին երիտասարդ-երիտասարդուհիներ: Պտոյտը սկսաւ Արթաքիի ծովափնեայ հանգստավայրով: Փոքիկները իրենց աշխուժութեամբ վայելեցին ծովուն խաղաղ վիճակը եւ լողացին: Ապա՝ ժամեր անց, մեկնեցանք Էւիայ շրջանը, ուր կը գտնուէին «Այա Քիրիաքի» մատուռը եւ ճաշարանը: Բաւական ճոխ եւ հայկական մթնոլորտով շրջապատուած, պարերով եւ խանդավառութեամբ՝ շարունակուեցաւ ճաշկերոյթը: Ընթացքին եղան վիճակահանութիւններ եւ յաղթողները եկեղեցւոյ Տիկնանց Մարմնոյ կողմէ ստացան գեղեցիկ յուշանուէրներ: Երեկոյեան պտոյտը շարունակուեցաւ դէպի Խալքիտա եւ հոն մասնակցողները ազատ երթեւեկութիւն մը կատարեցին, եւ գնահատականներ ներկայացուցին օրուան պտոյտին կապակցութեամբ: Հիանալի եւ անմոռանալի օր մը դարձաւ 24 Յունիս 2018ի այս մեծ պտոյտը: Առիթ մը եղաւ ծանօթանալու եւ առաւել ոգեւորութեամբ փափաքելու յաջորդիւ կազմակերպումը այսպիսի ճոխ ձեռնարկներու: Ուրախ ենք, որ այս կազմակերպուած պտոյտն ալ յաջողութեամբ պսակուեցաւ եւ իր ոգեշունչ կեցուածքով ու Աստուծոյ օրհնութեամբ իր աւարտին հասաւ: Մինչ նոր հանդիպում՝ բարի հանգիստ եւ բարի ամառ կը մաղթենք բոլորին:
Թաղային Խորհուրդ եւ Տիկնանց Մարմին Գոքինիոյ
