Եւրոխորհուրդի լրագրութեան եւ լրագրողներու ապահովութեան պաշտպանութեան խթանման մարմինը Մարտ 7ին յայտարարութիւն մը տարածած է՝ ահազանգ հնչեցնելով Ատրպէյճանի մէջ բանտարկուած ռուս-իսրայէլացի լրագրող Ալեքսանտր Լափշինի սպառնացող դատավարութեան առնչութեամբ:
Եւրոխորհուրդի կայքը կը յիշեցնէ, թէ Լափշին ձերբակալուած է Մինսկի մէջ, 2016ի Դեկտեմբեր 15ին, Ատրպէյճանի դիմումին համաձայն, իսկ Փետրուար 7ին արտայանձնուած է Պաքուի։ Լափշին կրնայ ութ տարուան բանտարկութեան դատապարտուիլ՝ 2011ի Ապրիլին, 2012ի Հոկտեմբերին եւ 2016ի Յունիսին Արցախ այցելելուն, «հակապետական կոչեր» հնչեցնելուն եւ Ատրպէյճանի քաղաքականութիւնը քննադատելուն համար:
