Ապրիլ 18ին, Ռաֆայէլ Արք. Մինասեան վերաօծեց Ջաւախքի հայ կաթողիկէ Խաշուտ-Աբաթխեւ գիւղի վերանորոգուած Սուրբ Խաչ եկեղեցին: Այս մասին կը հաղորդէ Akhaltskha.netը։ Արարողութեան ներկայ գտնուած են Վրաստանի մէջ քահանայապետական նուիրակ Արքեպիսկոպոս Մարեկ Սոլչինսկին եւ անոր քարտուղարը, Վրաստանի մէջ ծառայող երկու լատին ծէսի վարդապետ, Թիֆլիսի հայ կաթողիկէներու ժողովրդապետ Միքայէլ Վրդ. Խաչկալեան, Ծղալթպիլայի եւ Ջուլղաղի ժողովրդապետ Անատոլի Ծ. Վրդ. Իվանիւկ, Գիւմրիի հայ կաթողիկէներու ժողովրդապետ Գրիգոր Ա. Քհնյ. Մկրտչեան, Խաշուտի ժողովրդապետ Պօղոս Քհնյ. Գրիգորեան, եկեղեցւոյ վերանորոգման բարերարները, համայնքի բնակչութիւնը: Խաշուտի դեռ 1886 թուին կառուցուած Սուրբ Խաչ եկեղեցին վերջին մէկ տարուան ընթացքին հիմնովին նորոգուած է: Նորոգման աշխատանքները յատկապէս կատարուած են եկեղեցւոյ մէջ` Սուրբ Խորանը, յատակը, պատերը, պատուհանները, վերնատունը: Խորանին վերը ամրացուած Խաչելութեան մեծ պատկերը նուիրած է Ռաֆայէլ Արք. Մինասեան: Վերանորոգման աշխատանքներուն ծախսը ամբողջութեամբ հոգացած, կազմակերպած ու նախագծած են ծնունդով խաշուտցի մոսկուայաբնակ գործարարներ պրն. Ալեքսանդր Եադոյեան, պրն. Յովհաննէս Եադոյեան եւ ճարտարապետ պրն. Յակոբ Արթենեան: Նստարանները նուիրած է պրն. Մարտին Սիմոնեան: Աշխատանքները կատարած են գիւղի բնակիչները: Կառուցապատուած եւ բարեկարգուած են նաեւ եկեղեցւոյ բակն ու յարակից ճամբան:
