«Թալիշիստանը այսօր կ՛ապրի նոյն ճակատագիրը, որուն մասին հիմա կը խօսինք Ղարաբաղի վերաբերեալ: Թալիշիստանը, կարելի է ըսել, շրջափակման մէջ է»,- այսօր «Ստեփանակերտի շրջափակման ճեղքումը. 25 տարի անց» փորձագիտական աշխատաժողովի ժամանակ յայտարարած է օրերս ընտանիքով Ատրպէյճանէն Հայաստան տեղափոխուած, Թալիշական մշակոյթի խորհուրդի անդամ, Թալիշական ազատագրական շարժման մասնակից, «Թոլիշի Սադօ» թերթի թղթակից Շահին Միրզոեւը:
Ան պատմած է, որ թալիշները այսօր Ատրպէյճանի մէջ որեւէ հեռուստատեսութեամբ կամ ռատիոյով չեն կրնար բարձրացնել իրենց յուզող հարցերը:
«Անոնք ալ, որոնք քիչ մը կը խօսին, եթէ թալիշցի են, կը բանտարկուին կամ կը սպաննուին: Այսօր Ատրպէյճանէն Ռուսիա փախած է աւելի քան 300 հազար թալիշ, քանի որ կը հետապնդուին»,- «Փաներամա»ի փոխանցմամբ՝ ըսած է թալիշ գործիչը:
Ըստ անոր, քաղաքական գործիչները քանի դեռ կը մտածեն, Թալիշիստանի մէջ պիտի ծագին նոյն ռազմական գործողութիւնները ինչ որ Ղարաբաղի մէջ. «2 միլիոնէն աւելի թալիշներ կը բնակին Ատրպէյճանի մէջ, ինչպէ՞ս կարելի է զանոնք ոչնչացնել եւ ամբողջ աշխարհը ուղղակի կողքէն դիտէ: Ատրպէյճանի մէջ սեփական լեզուով ռատիօ, հեռուստատեսութիւն, դասագիրքերը պահանջելը, կը նշանակէ դառնալ անջատողական ու ազգին թշնամի»:
Հարցումին` ինչպէ՞ս կայացուց ընտանիքով Հայաստան գալու որոշումը, որ ինչ-որ տեղ վտանգաւոր չէ՞ր, Շ. Միրզոեւ պատասխանած է. «Ես ատիկա վտանգաւոր չէի համարեր: Վտանգաւոր էր իմ` Ատրպէյճան գտնուիլս: Ես Ատրպէյճանէն ուղղակի փախած եմ իմ ընտանիքով` մահէն խուսափելու համար: Դարձեալ հոն վերադառնալը` ինծի համար մահ էր: Իսկ Հայաստան գալը վտանգաւոր չէր: Ես չեմ սխալած»,- ըսած է Շահին Միրզոեւ:
Յիշեցնենք, որ Հայաստանի իշխանութիւններուն դիմած է Շահին Միրզոեւը` խնդրելով իրեն տրամադրել ժամանակաւոր ապաստան, քանի որ հանդիսանալով Թալիշական մշակոյթի խորհուրդի անդամ, Թալիշական ազատագրական շարժման մասնակից, «Թոլիշի Սադօ» թերթի թղթակից ստիպուած եղած է փախչելու Ատրպէյճանէն` ազգային եւ կրօնական փոքրամասնութիւններուն հանդէպ բռնաճնշումներու ու անոնց իրաւունքներու կոպտագոյն ոտնահարումներուն պատճառով, եւ ընտանիքով ժամանած Հայաստան: Հայաստանի իշխանութիւնները դրական արձագանգած են Շահին Միրզոեւի խնդրանքին:
