Տարուան ամէնէն շատ սիրուած եւ սպասուած տօները կը մօտենան՝ Կաղանդ եւ Սուրբ Ծնունդ…
Մեծ եւ փոքր՝ կը պատրաստուինք եւ խանդավառ կը սպասենք այդ օրերուն, որպէսզի մեր ընտանիքին եւ բարեկամներուն հետ տօնական սեղանին շուրջ նստինք, ուտենք, խմենք, Կաղանդ Պապային նուէրները բանանք եւ հաճելի ժամանակ անցընենք։
Սակայն, այս Սուրբ օրերուն, միայն նուէրներ չէ, որ պէտք է փոխադարձենք, այլ ամէնէն կարեւորը՝ մեր թանկարժէք զգացումները։ Պէտք չէ մոռնանք, մանաւա՛նդ այս օրերուն, տալու եւ «նուիրել»ու համեստութեամբ եւ առատաձեռնութեամբ՝ մեր օգնութիւնը, ազնիւ սէրը եւ ներողամտութիւնը…
Այսպէ՛ս, տօներու արձակուրդէն քանի մը օր առաջ, Հ.Կ.Խ.ի «Զաւարեան» Ազգային Վարժարանի Դ. դասարանի աշակերտներուն հետ Ευγένιος Τριβιζάςի «Ένα δέντρο μια φορά» ժապաւէնը դիտեցինք։ Աշակերտները՝ ոգեշնչուած, որոշեցին այս տարի տարբեր նամակ մը գրել Կաղանդ Պապային։
Ահա՛ հատուածներ (գրութիւնները պահած ենք բնագրին հարազատ — «Ազատ Օր») իրենց յուզիչ գրաւոր փորձէն…
— Սիրելի Կաղանդ Պապա,
Քանի մը օր առաջ տիկինը ֆիլմ մը դրաւ նայինք, որուն հերոսը պզտիկ աղքատ տղայ մըն էր, որուն մարդիկ կարեւորութիւն չէին տար։ Ան շատ ճաշ չունէր եւ շատ հին տան մէջ կ՛ապրէր։
Սուրբ Ծնունդին նախորդող օրը մարդիկ եկած էին այդ հին տունը քանդել։ Այլեւս տղան տուն չունէր եւ գիշեր մը ծառի մը տակ քնացաւ եւ ի վերջոյ պաղէն մեռաւ եւ իր հոգին երկինք գնաց։
Տեսնելով այս ֆիլմը՝ ես հասկցայ, որ գոհ պէտք է ըլլանք մեր ունեցածներէն եւ կը մաղթեմ՝ բոլոր աղքատ պզտիկները ճաշ, ջուր, տուն եւ ընտանիք ունենան, որ լաւ ապրին։
Սիրով՝ Քրիս
— Սիրելի Կաղանդ Պապա,
… Շատ վատ զգացի այդ տղային համար։ Այսպէս, այս տարի կը փափաքիմ աշխարհին բոլոր երեխաները աղքատութիւն չտեսնեն եւ միշտ ուրախ ըլլան։ Բոլոր մարդիկ օգնեն այս պզտիկներուն, որոնք կարիքը ունին»։
Սիրով՝ Ալեքս
— Սիրելի Կաղանդ Պապա,
… Այսպէս պէտք է՝ այս տղաները եւ աղջիկները որ կ՛ապրին գէշ պայմաններուն տակ եւ մեծ աղքատութեան մէջ, գոնէ այս սուրբ օրերուն իրենց մաղթանքները իրականութիւն ըլլան։ Կը մաղթեմ նաեւ այս տարի խաղաղութիւն եւ սէր բերես, սիրելի Կաղանդ Պապա։
Սիրով՝ Կարօ
— Սիրելի Կաղանդ Պապա,
… Այս ֆիլմէն զգացի մեծ տխրութիւն… Աշխարհին վրայ շատ աղքատ մարդիկ կան եւ երեխաներ, որ նոյնիսկ ճաշ չունին։ Ասոր համար, այս տարի կը մաղթեմ, որ մարդիկ աղքատ եւ տխուր չըլլան։ Բոլոր մանուկները տաքուկ տուն եւ ընտանիք ունենան։ Սիրելի Կաղանդ Պապա, եթէ կրնաս սէր եւ առողջութիւն բե՛ր բոլորին, եւ հոգ չէ՝ եթէ ինծի խաղալիք չբերես այս տարի։
Սիրով՝ Յարութ
— Սիրելի Կաղանդ Պապա,
… Երբ ժապաւէնը վերջացաւ, շատ գէշ զգացի եւ տխրեցայ, որովհետեւ հերոսը աղքատ տղայ մըն էր, որ ո՛չ տուն, ոչ ալ ընտանիք ունէր։ Ես կ՛ուզեմ բոլոր երեխաները առողջ եւ ուրախ ըլլան եւ մարդիկ աղքատութեան մէջ չապրին։
Սիրով՝ Քորինա
— Սիրելի Կաղանդ Պապա,
… Սրտնեղուած եւ տխուր էի, երբ վերջացաւ ֆիլմը… Վստահ եմ, որ հարուստ են այն մարդիկ, որ ազատութիւն, առողջութիւն եւ սէր ունին։
Ուրեմն, այս տարի կը մաղթեմ խաղաղութիւն, սէր եւ ընտանիք ունենան աշխարհին բոլոր երեխաները։
Սիրով՝ Խարի
