Միացեալ Նահանգներու մէջ գործող Համահայկական Ուսանողական Ընկերակցութիւնը (All-ASA) Հայոց Ցեղասպանութեան ժխտման դէմ բողոքի լուռ ցոյցեր պիտի կազմակերպէ, բարձրագոյն վարժարաններու եւ համալսարաններու մէջ:
Ըստ «Ասպարէզ»ի՝ 9 Փետրուարին «Ժխտման բիծը» կարգախօսով տեղի ունենալիք ցոյցը հովանաւորած են Հ.Յ.Դ. Միացեալ Նահանգներու Արեւելեան եւ Արեւմտեան շրջաններու կառոյցները, Հ.Յ.Դ. «Շանթ» Ուսանողական Միութիւնը, ինչպէս նաեւ՝ «Ալֆա Կամմա Ալֆա»ն եւ «Ալֆա Էփսիլոն Օմեկա»ն: «Ժխտման բիծը» կը կազմակերպուի ամէն տարի՝ ուսանողութեան շրջանակին մէջ Հայոց Ցեղասպանութեան վերաբերեալ իրազեկութեան մակարդակը բարձրացնելու նպատակով:
Բողոքի ցոյցի ընթացքին ուսանողները կը պարզեն պաստառներ, կը խօսին Թուրքիոյ վարած ժխտողական քաղաքականութեան, ինչպէս նաեւ՝ Ցեղասպանութեան պատմական փաստի ճանաչման ու հատուցման տրամադրման անհրաժեշտութեան մասին:
