Մայիս 2019ի երկրորդ շաբաթավերջի այս եւ յառաջիկայ օրերը յագեցած պիտի ըլլան համահայկական, այլեւ ազգային-գաղափարական մեր երթը վերանորոգելու կոչուած զոյգ հաւաքներու ողջունելի նշանակութեամբ եւ կարեւորութեամբ։
Հայ Մարմնակրթական Ընդհանուր Միութիւնը (Հ.Մ.Ը.Մ) Աթէնքի մէջ, 10 եւ 11 Մայիս 2019ին, պիտի գումարէ իր Երիտասարդական Ա. Համագումարը։
Իսկ Հ.Յ.Դ. Բիւրոյի Երիտասարդական Գրասենեակը, 10-12 Մայիսին, ի մի պիտի բերէ Եւրոպայի տարածքին գործող Հ.Յ.Դ. Երիտասարդական Միութեանց ներկայացուցիչները՝ տարածաշրջանային խորհրդաժողովի մը այժմէական օրակարգով։
Որոշապէս մեր երիտասարդ սերունդին ուղղուած եւ առնչուած ըլլալով՝ զոյգ հաւաքներն ալ առաջին հերթին կու գան շեշտելու հայութեան վաղուան օրուան ի խնդիր նորահաս մեր ուժերը կազմակերպականօրէն լարելու, գաղափարականօրէն աշխուժացնելու եւ Հայ Դատի ուղղութեամբ զօրաշարժ յառաջացնելու հաւաքական նախանձախնդրութիւնն ու մարտունակութիւնը։
Պատահականօրէն կամ սոսկ զուգադիպութեամբ չէ, որ Հ.Յ.Դ. եւ Հ.Մ.Ը.Մ. հայ երիտասարդութիւնը առանձնայատուկ կարեւորութեամբ դարձուցած են իրենց ուշադրութեան կիզակէտը։
Ինչպէս Հայ Յեղափոխական Դաշնակցութիւնը իր ստեղծման առաջին իսկ օրերէն հայ երիտասարդութեան վրայ դրաւ հայ ազգային-ազատագրական պայքարի յաղթանակին եւ հայ ժողովուրդի ամբողջական ազատագրումին մեծ գրաւը, այնպէս եւ Հ.Յ.Դ. գաղափարական ներշնչումով կեանքի կոչուած եւ արդէն 100ամեայ ուղի նուաճած Հ.Մ.Ը.Մ.ը, իր կարգին, հայոց նորահաս սերունդներու մարդկային եւ ազգային առողջ կազմաւորման ու վերասլաց թռիչքին մէջ գտաւ ու ամրագրեց ցեղասպանութենէն վերապրած մեր ժողովուրդին վերականգնումի անփոխարինելի երաշխիքն ու անպարտելի զէնքը։
Թէ´ Հ.Յ.Դ. Եւրոպայի Երիտասարդականներու խորհրդաժողովը եւ թէ Հ.Մ.Ը.Մ.ի երիտասարդական անդրանիկ համահայկական համագումարը, վստահաբար, իրենց օրակարգին վրայ պիտի ունենան այժմէական այն բոլոր խնդիրները, որոնք աղերս ունին կազմակերպ հայութեան ներկայիս դիմագրաւած մարտահրաւէրներուն հետ՝ Հայ Դատի ազգային-քաղաքական պայքարին առնչուած ըլլան անոնք, թէ հայոց նորահաս սերունդներու նորովի աշխուժացման՝ մերօրեայ ժամանակներու համապատասխան ոգիով եւ ոգեւորութեամբ փարելու համար այսօրուան մեր երթը յառաջ մղելու եւ վաղուան մեր օրը նուաճելու կոչուած սերունդի իրենց հիմնարար դերակատարութեան, առաքելութեան եւ կազմակերպական յաղթարշաւին։
Քաղաքակրթական օրինաչափութիւն է, որ արեւուն տակ իրենց արժանի տեղը գրաւելու ընդունակ են յատկապէս այն ազգերն ու ժողովուրդները, որոնք օժտուած են ժամանակին հետ քայլ պահելու կոչուած սերնդափոխութեան եւ, այդ ճամբով, հաւաքական վերանորոգումի բնատուր կենսունակութեամբ։
Հայ ժողովուրդը ոչ միայն բացառութիւն չի կազմեր ընդհանուր այդ օրէնքէն, այլեւ առաւելագոյն խտութեամբ եւ ճառագայթումով կը հաստատէ զայն։
Խօսքը չի վերաբերիր սոսկ վերարտադրութեան՝ տարիքը առնող եւ ծերացող ազգերուն եւ ժողովուրդներուն կեանքը վերանորոգելու եւ շարունակելու կոչուած բնական սերնդափոխութեան։
Խօսքը կը վերաբերի էապէս ու ըստ ամենայնի վերանորոգումի կենսունակութեամբ յատկորոշուող սերնդափոխութեան, որ ահա աւելի քան հարիւր տարիէ ի վեր՝ իրերայաջորդ երիտասարդ սերունդներու տոգորումով եւ մարտունակութեամբ, կը հունաւորէ երթը Թուրքիոյ գործադրած ցեղասպանութենէն վերապրած հայ ժողովուրդի Փոքր Ածուին։
Որքան ալ փոխուին ժամանակները եւ որքան ալ քաղաքակիրթ աշխարհը տագնապեցնող համընդհանուր նիւթապաշտութիւնը եւ եսակեդրոնութիւնը, անտարբերութիւնն ու մեղկութիւնը վարակեն նոյնիսկ ամէնէն կենսունակ ազգերու երիտասարդ սերունդները, այդուհանդերձ՝ հոսանքն ի վեր թիավարելու յանձնառութիւնն ու վճռականութիւնը վերստին կը յաջողին շունչ ու կորով ներշնչել նորահաս սերունդներուն։
Որոշապէս հայ ժողովուրդի պարագային սերնդափոխութեան այդ օրհնաբեր կենսունակութիւնը ինքնավստահութեամբ եւ հպարտութեամբ կը լեցնէ միտքն ու սիրտը աշխարհացրիւ ու պահանջատէր հայութեան։
Շաբաթավերջի այս քանի մը օրերը ինքնաքննարկումի եւ կազմակերպական վերաշխուժացման աշխոյժ մթնոլորտ մը պիտի ստեղծեն Հ.Յ.Դ.ի եւ Հ.Մ.Ը.Մ.ի շուրջ բոլորուած հայ երիտասարդութեան համար։
Հայ Դատի պահանջատիրութեան, Հայաստանի եւ Արցախի հզօրացման ու ընդհանրապէս հայ ժողովուրդի ազգային-քաղաքակրթական ինքնահաստատման մեծ օրակարգը, իրմէ ճիւղաւորուած բոլոր մարտահրաւէրներով, այս օրերուն համաժողովի բերած է աշխարհասփիւռ հայութեան, յատկապէս Եւրոպայի տարածքին գործող երիտասարդ ուժերը։ Ե´ւ Հ.Յ.Դ.ի, ե´ւ Հ.Մ.Ը.Մ.ի շունչով եւ ոգիով թրծուած մեր երիտասարդութիւնը ահա ոտքի կանգնած է՝ թէ´ իր սերունդին առջեւ աշխատանքի ուղի բանալու, թէ´ հայոց ամբողջ ազգի եւ հայրենիքի պայծառ գալիքին հաշւոյն ուժերու կազմակերպ լարում առաջացնելու յանձնառութեամբ եւ վճռականութեամբ։
Ճամբայ բացէ´ք։
