Կիրակի՝ 11 Յունիս 2017ին, Ֆիքսի «Արամ Մանուկեան» ակումբի «Թ. եւ Ռ. Աւետիքեան» սրահին մէջ, տեղի ունեցաւ Յունաստանի Համազգային Հայ Կրթական եւ Մշակութային Միութեան Շրջանային Վարչութեան կազմակերպած միօրեայ 21րդ ներկայացուցչական ժողովը։
Ներկայացուցչական ժողովին մասնակցեցան Շրջանային Վարչութիւնը, Համազգայինի միութենական բոլոր կառոյցները՝ մասնաճիւղեր, պարի միաւորը, երաժշտանոցը, «Յակոբ Փափազեան» երգչախումբի, «Արշաւիր Գազանճեան» թատերախումբի, լուսանկարչական բաժանմունքի վարչութիւնները, կանոնագրային-հրատարակչական, հաշուեքննիչ, դիմատետրի յանձնախումբները, յաւելեալ՝ բոլոր փափաքող համազգայնականները։
Ժողովին մասնակցեցան Հ.Յ.Դ. Յունաստանի Կեդրոնական Կոմիտէի ներկայացուցիչները։ Մասնակցողներու ընդհանուր թիւը կը հասնէր 30ի։
Ներկայացուցչական ժողովի դիւան ընտրուեցան նախագահ՝ ընկ. Անդրանիկ Շահպազեան, եւ քարտուղարուհի՝ ընկ. Լիլիթ Արզումանեան։
Բոլոր կառոյցներուն խօսք տրուեցաւ ամփոփ կերպով ներկայացնելու իրենց մինչայժմու՝ մօտ կէս տարուան գործունէութեան ու ապագայ ծրագրումներու մասին։
Ներկայութեան ստուգումէն ետք, ժողովի նախագահը խօսքը փոխանցեց Համազգայինի Շրջանային Վարչութեան ատենապետին՝ միութենական կարգ մը զեկոյցներ ու յայտարարութիւններ կատարելու համար միութեան յառաջիկայ ծրագիրներուն ու գործունէութեան շուրջ։ Ապա՝ բացատրութիւններ տրուեցան Ներկայացուցչական ժողովի օրակարգին, աշխատանքի ձեւին եւ օրուան գլխաւոր աշխատանքը հանդիսացող ծրագիր-կանոնագրի ու ժողովավարական կանոններու յաջորդական աշխատանքի հանգրուաններուն մասին, որու աւարտին, սոյն կանոնագիրները պիտի յղուին Համազգայինի Կեդրոնական Վարչութեան՝ առ ի վաւերացում, որմէ ետք ալ անոնք անջատաբար պիտի տպագրուին գրքոյկով եւ պիտի տրամադրուին բոլոր մասնաճիւղերու անդամներուն ու փափաքողներուն։
Այսպէս, առաւօտեան նիստին կարդացուեցաւ ծրագիր-կանոնագիրի նախագիծը, բացատրութիւններ տրուեցան գոյութիւն ունեցող հարցականներու շուրջ, որմէ յետոյ ժողովականները կատարեցին իրենց թելադրանքները, առաջարկները եւ պարզեցին իրենց տեսակէտները, որոնք արձանագրուեցան Շրջանային Վարչութեան եւ անոր յառաջացուցած կանոնագրային-հրատարակչական յանձնախումբին կողմէ՝ տուեալ փոփոխութիւնները կատարելու համար։ Յայտարարուեցաւ նաեւ, թէ կանոնագիրներու աշխատանքը բաց կը մնայ յառաջիկայ ամիսներուն ալ, յաւելեալ հնարաւորութիւն տալով մասնաճիւղերուն իրենց առաջարկները ամբողջացնելու համար, կանոնագիրները իրենց վերջնական ձեւին հասցնելու առաջադրանքով։
Այս աշխատանքի աւարտին, կարդացուեցաւ նաեւ CID (Counsil International Dance)-Պարի Միջազգային Խորհուրդի հայերէն նոր կանոնագրութիւնը պատրաստուած Համազգայինի կողմէ, որ ուղղակիօրէն կ’որդեգրուի UNESCOի պարի համաշխարհային հաստատութեան կողմէ։ (Տես «Ազատ Օր»ի մէջ լոյս տեսած պաշտօնական հաղորդագրութիւնը՝ Ուրբաթ-Շաբաթ 8-9 Յունիս 2017ի թիւին մէջ)։
Ճաշի դադարէն առաջ, անակնկալ հեռաձայնով մը ժողովականները տեղեկացան Համազգայինի նախկին վարչական, երգչախումբի եւ թատերախումբի անդամ՝ ընկ. Մալխաս Մալխասեանի մահուան գոյժը։ Նորոգ հանգուցեալ ընկերոջ թարմ յիշատակը յարգուեցաւ ժողովականներուն կողմէ վայրկեանի մը յոտնկայս լռութեամբ։
***
Յետմիջօրեայ նիստին, սկսուած աշխատանքը շարունակուեցաւ Ժողովավարական կանոններու վերաբերող յօդուածներու ընթերցմամբ ու քննարկմամբ։ Հոս եւս ժողովի մասնակիցներուն կողմէ կատարուեցան առաջարկներ, թելադրանքներ ու անհրաժեշտ լրացումներ։
Ժողովը իր աւարտին հասնելէ առաջ, վերջին օրակարգը կ’ընդգրկէր յունական կանոնագիրը, որ առաւելաբար կը նախատեսէ օրինական ու իրաւական այնպիսի յօդուածներ, որոնք ուղղակի առնչուած են համազգայնական միութենական կառոյցի հեզասահ գործունէութեան հետ՝ մարզպետարաններու, քաղաքապետութիւններու, հարկային հաստատութիւններու, պետական սպասարկութիւններու, դրամատուներու, կտակներու-ժառանգներու, միութենական նիւթական գործառնութիւններու, Հայաստանի ու սփիւռքեան կառոյցներու հետ ուղղակիօրէն յարաբերուելու բազմաբնոյթ կարելիութիւններ ստեղծելով։
Ներկաները գոհունակութիւն արտայայտեցին կատարուած ընդհանուր ու ամբողջական աշխատանքին կապակցութեամբ։
Օրուան ժողովական ժամանակացոյցի նախատեսութեամբ վերջ գտաւ երկրորդ նիստն ալ, ազգային քայլերգի յոտնկայս երգեցողութեամբ։
***
Նիստի փակումէն ետք, Շրջանային Վարչութիւնը առանձին հանդիպումներ ունեցաւ որոշ կառոյցներու հետ, լուծելու համար դիմագրաւուող կազմակերպական ու յարակից դժուարութիւններ ու մղում տալով միութենական յառաջիկայ ծրագրումներու։
ՀԱՄԱԶԳԱՅԻՆԻ ԹՂԹԱԿԻՑ
