Յաջորդ շաբաթ ամերիկեան շարժանկարի թատրոններուն մէջ պիտի սկսի ցուցադրուելու Հայոց Ցեղասպանութեան մասին «Խոստումը» ժապաւէնը, որ բարեյաջող յաղթահարեց թրքական լոպպիի` ժապաւէնի յաջողութիւնը խորտակելու բազմաթիւ փորձերը,- կը հաղորդէ «Արմէնփրես»՝ վկայակոչելով ewsbusters.orgը:
Թրքական կառավարութիւնը մէկ դար անց ալ կը ժխտէ Ցեղասպանութեան փաստը, եւ ատոր մասին ժապաւէնները մեծ դիմադրութեան կը հանդիպին: Ժապաւէնին մէջ նկարահանուած աստղերէն Քրիսթիան Պէյլ նոյնիսկ չէ բացառած, որ կրնայ «հակահարուած» ըլլալ։
Ժապաւէնին քննարկումը տեղի ունեցած է Թորոնթոյի շարժանկարի փառատօնին, 2 ամիս առաջ: Անոր յաջորդած են ցուցադրութիւնները Լոնտոնի եւ Վատիկանի մէջ, իսկ Ապրիլ 21ին «Խոստումը» պիտի սկսի ցուցադրուելու ամերիկեան շարժանկարի թատրոններուն մէջ:
Ահա այն անուանի աստղերը, որոնք կը փորձեն պահել «Խոստումը»:
Շէր (Շերիլին Սարգիսեան) ծագումով հայ է: Ժապաւէնը դիտելէն ետք, ան իր թուիթըրեան էջին մէջ գրած էր.- «Այս ժապաւէնը կոտրեց սիրտս, եւ ոչ միայն հայերու համար, այլ բոլոր անոնց, որոնք տառապած են, կորսնցուցած են իրենց սիրելիները: Մենք բոլորս ծաղիկներ ենք, որոնք գեղեցիկ են փունջի մէջ»:
Հոլիվուտեան դերասան Ճորճ Քլունի եւ անոր կինը` մարդու իրաւունքներու պաշտպան Ամալ Քլունի, ներկայ գտնուած են ժապաւէնի լոնտոնեան ցուցադրութեան: Ամալ Քլունի յայտնի է թրքական ժխտողականութեան դէմ փաստաբանական իր նշանակալի ներդրմումով:
Լէոնարտօ տի Քափրիօ իր ֆէյսպուքեան էջին մէջ գրած էր.- «Օսքար Այզեք, Քրիսթիան Պէյլ եւ Շարլոթ լէ Պոն, Թերի Ճորճի ղեկավարութեամբ, անկրկնելի ներկայացում բեմադրած են «Խոստումը» ժապաւէնին մէջ: Կ՛ողջունեմ ամբողջ խումբը` առասպելական արտադրող Մայք Մետաւոյի գլխաւորութեամբ, որուն տաղանդն ու նուիրուածութիւնը կեանքի կոչեցին այս կարեւոր ծրագիրը»:
Մարտին, դերասան եւ արտադրող Տին Քէյն այցելած էր Երեւան` հանդիպելու սուրիահայ փախստականներուն հետ: «Հայերը դարերով հալածուած են, անոնք եղած են քրիստոնէութեան առաջին ամրոցը, եւ անոնք միակ քրիստոնէական ամրոցն են Միջին Արեւելքի մէջ»: Քէյն իր աջակցութիւնը յայտնած է նաեւ «Խոստումը» ժապաւէնին: Ժապաւէնի վերաբերեալ՝ դերասանը գրած էր.- «Քոլէճի մէջ պատմութիւն ուսումնասիրելու ատեն ես իմացած եմ ցեղասպանութիւններու մասին, ինչպիսիք են Հայոց Ցեղասպանութիւնը եւ Հոլոքոսթը: Մեր օրերուն եւս ցեղասպանութիւններ կ՛իրագործուին, խօսքս՝ Սուրիոյ, Իրաքի եւ Սուտանի մասին է: Կ՛երդնում պահելու «Խոստումը» եւ պատմութեան դասագիրքեր «աքսորել»ու ցեղասպանութիւնը»:
«Ես կը միանամ «Խոստումը» ժապաւէնին ու կը խոստանամ երբեք չմոռնալ»,- իր թուիթըրեան էջին մէջ գրած էր երգչուհի Պարպրա Սթրէյզընտ:
Էլթըն Ճոն թուիթըրի իր էջին մէջ գրած էր.- «Ուրախ եմ յայտարարելով «Խոստումը» ժապաւէնի ցուցադրման մեկնարկին մասին: Ժապաւէնը կը ներկայացնէ Հայոց Ցեղասպանութեան պատմութիւնը: Կը միանամ «Խոստումը» պահելու շարժման եւ կը խոստանամ պաշտպանել մարդու իրաւունքները, արժանապատուութիւնը եւ հաւասարութիւնը: Շատ ուրախ եմ, որ ժապաւէնի ամբողջ հասոյթը պիտի օգտագործուի բարեգործական նպատակով, քանի որ կը կարծեմ, թէ ոչ ոք պէտք է լքուի»:
Սիլվեսթըր Սթալոնէ, անդրադառնալով ժապաւէնին, գրած էր.- «Արտակարգ ժապաւէն պիտի ցուցադրուի Ապրիլ 21ին: Սա այնպիսի նիւթ է, որմով հիացած եմ տասնամեակներէ ի վեր, եւ շատ տարիներ պէտք էին՝ զայն ժապաւէնի վերածելու համար: Սա ճշմարիտ եւ անհաւատալի կարեւոր պատմական ողբերգութիւն է, որ ունի բոլոր իւրօրինակ բաղադրիչները, որոնք կրնան ժապաւէնը բարձրացնել «Օսքար»ի մակարդակին: Քրիսթիան Պէյլ եւ Օսքար Այզեք իրենց դերերը կատարեալ կը խաղան: Առանձնակի պէտք է նշել նաեւ առասպելական արտադրող Մայք Մետաւոյի դերը, որ կրցաւ այս ծրագիրը կեանքի կոչել»:
Դերասան Տոն Չիտլ թուիթըրի մէջ յայտարարած էր, որ տեսած է ցեղասպանութեան հետեւանքները Տարֆուրի մէջ: «Կ՛երդուիմ պահել «Խոստումը», բարձրացնել տեղեկացուածութիւնը եւ պայքարիլ ցեղասպանութիւններու դէմ»։
Անուանի թենիսիստ Անտրէ Աղասի նոյնպէս իր աջակցութիւնը յայտնած է ժապաւէնին: «Ուրախ եմ, որ Քըրք Քըրքորեանի մտադրութիւնը կեանքի կոչուեցաւ: Օգնեցէք ինծի պահելու անոր «Խոստումը»,- թուիթըրի մէջ գրած էր թենիսիստը: Ժապաւէնին իր աջակցութիւնը յայտնած է նաեւ դերասան Թոնի Կոլտուին: Ան թուիթըրի մէջ գրած է.- «Կը կատարենք «Խոստումը»` ամէն օր հոգ տանելով մեր մտերիմներուն: Ժապաւէնին առաջին ցուցադրութիւնը` Ապրիլ 21ին, իսկ ամբողջ հասոյթը պիտի ուղղուի բարեգործութեան»:
Յայտնի հոլիվուտեան դերասան Ռայեան Կոսլինկ միացած է Հայոց Ցեղասպանութեան մասին «Խոստումը» ժապաւէնին նուիրուած քարոզարշաւին: Ան «կատարէ խոստումդ» գրած է` աջակցութիւն յայտնելով մարդու իրաւունքներու պաշտպանութեան Քոնկոյի մէջ: Կոսլինկ տեսահոլովակ հրապարակած է Twitterի մէջ այդ մասին: «Պատերազմը Քոնկոյի մէջ ամենամահաբերը դարձաւ Երկրորդ Համաշխարհային Պատերազմէն ետք: Կը խոստանամ կատարել խոստումս` սատարել մարդու իրաւունքներու պաշտպանութեան Քոնկոյի մէջ»,- ըսած է Կոսլինկ:
