Հայաստանի Հանրապետութեան սփիւռքի նախարարութիւնը, Համաշխարհային Հայկական Կոնգրեսը եւ Ռուսաստանի Հայերի Միութիւնը «Հայապահպանութեան գործում նշանակալի աւանդի համար» 2017 թ. մրցանակաբաշխութեան շրջանակներում յայտարարում են մրցոյթների պայմանները հետեւեալ անուանակարգերում՝
1. «Մայրենիի պաշտպան» (անհատներ),
2. «Լաւագոյն հայկական կրթօջախ»,
3. «Երիտասարդական, ուսանողական կազմակերպութիւն»,
4.  «Ազատ Արցախ» մանկապատանեկան լաւագոյն   ստեղծագործութիւնների մրցոյթ (նկար, քանդակ (լուսանկար), երգ, բանաստեղծութիւն, պատմուածք, շարադրութիւն, էսսէ եւ այլն):
1. «Մայրենիի պաշտպան» (անհատների համար) մրցոյթի կազմակերպման նպատակն է խրախուսել սփիւռքեան կառոյցներին եւ անհատներին, ովքեր մեծ ներդրում ունեն մայրենիի պահպանման, տարածման, հայեցի կրթութեան եւ դաստիարակութեան գործում:
Մրցոյթին կարող են մասնակցել սփիւռքում գործող համայնքային կազմակերպութիւններ, կրթօջախներ, մշակութային հաստատութիւններ, մայրենի լեզուի ուսուցիչներ, լեզուաբաններ, մշակոյթի եւ գրական գործիչներ:
2. «Լաւագոյն հայկական կրթօջախ» մրցոյթի նպատակն է խրախուսել սփիւռքում հայ ազգային ինքնութեան պահպանման ու զարգացման, սերունդների հայեցի կրթութեան եւ դաստիարակութեան, հայապահպանական ծրագրերի իրականացման գործում նշանակալի ներդրում ունեցող հայկական կրթօջախներին, խթանել նրանց ստեղծումն ու ազգապահպան գործունէութիւնը: Մրցոյթին կարող են դիմել սփիւռքեան կրթօջախները (ամէնօրեայ կրթօջախներ, մէկօրեայ (շաբաթօրեայ, կիրակնօրեայ) դպրոցներ, դասընթացներ, խումբեր, խմբակներ, նախադպրոցական, մասնագիտացուած կրթական հաստատութիւններ, տեղի բնակավայրերի տարբեր կրթական հաստատութիւններում, մանկապատանեկան կեդրոններում՝ համապատասխանաբար  որպէս խմբակներ, ֆակուլտատիւ/կամ ընտրական պարապմունքներ, այլ կրթական հաստատութիւն):
3. «Երիտասարդական, ուսանողական կազմակերպութիւն» մրցոյթի նպատակն է ակտիւացնել եւ խրախուսել սփիւռքի երիտասարդական, ուսանողական կազմակերպութիւնների գործունէութիւնը՝ կարեւորելով նրանց դերակատարութիւնը համահայկական, համազգային խնդիրների լուծման գործում: Մրցոյթին կարող են մասնակցել սփիւռքում գործող երիտասարդական կառոյցները, ինչպէս նաեւ՝ ուսանողական կազմակերպութիւնները, որոնք ունեն առնուազն երեք տարուայ գործունէութեան փորձ:
4. «Ազատ Արցախ» մանկապատանեկան լաւագոյն ստեղծագործութիւնների մրցոյթը: Մրցոյթը նպատակ ունի նպաստել հայրենասիրական զգացումների, ազգային ինքնագիտակցութեան, պատմական եւ մշակութային գիտակցութեան ձեւաւորմանն ու զարգացմանը: Մասնակիցները կարող են ներկայացնել արուեստի տարբեր ոլորտները ներկայացնող աշխատանքներ՝ նկար, քանդակ (լուսանկարը), փայտագործական, խեցեգործական իր/առարկայ, երաժշտական ստեղծագործութիւն, բանաստեղծութիւն, շարադրութիւն եւ այլն:

Նշուած 4 մրցոյթներին մասնակցել ցանկացողները
լրացուած յայտադիմումները ներկայացնում են
Հ. Հ. սփիւռքի նախարարութիւն (էլ. փոստով կամ փոստով):
Դիմումներն ընդունւում են մինչեւ 2017 թուականի Նոյեմբերի 1ը:

Մրցանակաբաշխութեանը դիմող եւ դրա արդիւքնում յաղթող ճանաչուող կառոյցները եւ անհատները պարգեւատրւում են դրամական եւ այլ պարգեւներով:
Մրցոյթների արդիւնքները կþամփոփուեն 2017 թ. Դեկտեմբերին:
Մասնակցութեան յայտին կից անհրաժեշտ է ներկայացնել.
— Կրթութեան մասին փաստաթուղթ (պատճէնը / scan), եթէ առկայ է,
— Համայնքային կառոյցի կամ դպրոցի կողմից տրուած բնութագիր-երաշխաւորագիր (հաստատուած կնիքով եւ ղեկավարի ստորագրութեամբ),
—  Դիմողի գործունէութեան նկարագիր,
— Նիւթեր, այդ թւում՝ տեսանիւթեր (եթէ կան), որոնք կը փաստեն մրցանակաբաշխութեան դիմողների կողմից իրականացուած հայապահպանական ծրագրերի մասին:
Ներկայացուած յայտերը կþուսումնասիրուեն մասնագիտական մրցութային յանձնախումբի կողմից:
«Հայապահպանութեան գործում նշանակելի աւանդի համար» համահայկական ամենամեայ մրցանակաբաշխութեան 2017 թ. մրցոյթների արդիւնքների մասին տեղեկատուութիւնը կը տեղադրուին Հ. Հ. սփիւռքի նախարարութեան պաշտօնական կայքէջում՝
www.mindiaspora.am կամ www.hayernaysor.am «Հայերն Այսօր» էլ. թերթում:

Հ. Հ. ՍՓԻՒՌՔԻ ՆԱԽԱՐԱՐՈՒԹԻՒՆ