Հ.Հ. սփիւռքի նախարարութիւնը կը վերսկսի Սփիւռքի երիտասարդներու հայրենաճանաչութեան «Արի տուն» ծրագիրը:
Ծրագիրը 2017թ. կը մեկնարկէ Յունիս 18ին եւ պիտի շարունակուի մինչեւ 26 Օգոստոս՝ 8 հանգրուաններով (իւրաքանչիւր հանգրուանը՝ 14 օր, որմէ 9 օր՝ հիւրընկալող ընտանիքի հետ, 4 օրը՝ բանակում): Ծրագրին կրնան մասնակցիլ 13-18 տարեկան երիտասարդները, որոնք նախապէս չեն մասնակցած «Արի տուն» ծրագրին:
Ծրագրի ընթացքին երիտասարդները կրնան հիւրընկալուիլ բարեկամներու տուն, իսկ եթէ բարեկամներ չունին՝ Երեւան քաղաքի վարչական շրջաններու, Հ.Հ. մարզպետարաններու եւ Հ.Հ. սփիւռքի նախարարութեան կողմէն ընտրուած ընտանիքներու յարկին տակ: Երիտասարդները ընտանիքներէն ներս կը հիւրընկալուին անվճար: Ծրագրին մասնակցութեան համար խումբերու եւ անհատներու հաւաքագրումը եւ Հայաստան այցելութիւնը կ’իրականացուի Սփիւռքի համայնքային կառոյցներու, կրթօջախներու, հայկական կազմակերպութիւններու կողմէն՝ տուեալ երկրի մէջ Հ.Հ. դիւանագիտական ներկայացուցչութիւններու աջակցութեամբ: Ծրագրին մասնակցելու համար կրնան դիմել  նաեւ անհատապէս՝ տեղեկացնելով համապատասխան համայնքային կառոյցին: Հայաստան այցելող երիտասարդները իրենք կը հոգան իրենց ճանապարհածախսը կամ իրենց միջոցներով կը գտնեն հովանաւորներ։
«Արի Տուն» ծրագրի ծիրէն ներս Հ.Հ. սփիւռքի նախարարութիւնը կ’ապահովէ երիտասարդներու դիմաւորումն ու ճանապարհումը, կը կազմակերպէ հայոց լեզուի դասընթացներ,  այցելութիւններ թանգարաններ, շրջայցեր՝ Հայաստանի տեսարժան վայրեր: Ծրագրի բանակումի հանգրուանին պիտի կազմակերպուին նաեւ ուսուցողական ծրագրեր. հայոց լեզուի, հայրենագիտութեան, ազգային երգի ու պարի դասընթացներ: Պիտի կազմակերպուին հանդիպումներ Հայաստանի պետական, հասարակական, մշակութային գործիչներու հետ եւ այլն: Պտոյտներու ժամանակ անվտանգութիւնը ապահովելու նպատակով անոնց պիտի ուղեկցին բժիշկը եւ ոստիկանական անձնակազմը:
Լրացուցիչ տեղեկութիւններու համար կրնաք դիմել aritun.mindiaspora@gmail.com եւ europedep@gmail.com, europedep@yahoo.fr