– ՌՈՒՍԻՈՅ նախագահ Վլատիմիր Փութին Տումայի մէջ իր արտասանած խօսքին մէջ կոչ ուղղեց «ահաբեկչութեան դէմ ներկայ պատերազմին մէջ դասեր քաղելու Համաշխարհային Բ. պատերազմէն»` շեշտելով, որ «անհրաժեշտ է աշխատանք տանիլ ամրապնդելու մեր զինուորական պատրաստուածութիւնը ընդդէմ ՕԹԱՆ-ի»: Փութին ըսաւ, որ «ՕԹԱՆ իր թշնամական խօսքերը կը շատցնէ, եւ Ռուսիան ստիպուած է պատասխանելու»` շեշտելով. «Անհրաժեշտ է միջոցառումներ որդեգրել Ռուսիոյ սահմաններուն մօտ ՕԹԱՆ-ի թշնամական վարմունքներէն մեր անվտանգութիւնը պաշտպանելու համար»:

– ԹՈՒՐՔԻՈՅ արտաքին գործոց նախարար Մեւլութ Չաւուշօղլու ըսաւ, որ Իսրայէլի հետ Թուրքիոյ յարաբերութիւններու բնականոնացումը կախեալ է յաջորդ երկկողմանի բանակցութեան ընթացքին Իսրայէլի կեցուածքէն: «Իսրայէլի որդեգրելիք միջոցառումներուն լոյսին տակ կարելի պիտի ըլլայ յառաջիկայ ժողովին ընթացքին համաձայնութիւն գոյացնել», ըսաւ ան` առանց այդ ժողովին թուականը նշելու:

– «ՌՈՅԹԸՐԶ» կը հաղորդէ, որ Գերմանիոյ վարչապետ Անկելա Մերքել յայտարարած է, որ Գերմանիոյ պէտք պիտի ըլլայ զգալիօրէն աւելցնել պաշտպանութեան ծախսերը` արտաքին սպառնալիքները դիմագրաւելու համար: Ան ըսած է, որ ներկայիս Եւրոպական Միութիւնը ի վիճակի չէ ինքզինք պաշտպանելու եւ չի կրնար միշտ յոյս դնել Միացեալ Նահանգներու հետ անդրատլանտեան գործընկերութեան վրայ: «Ատիկա կը նշանակէ, որ այնպիսի երկիր մը, ինչպիսին Գերմանիան է, որ պաշտպանութեան նպատակներով կը ծախսէ համախառն ներքին արտադրութեան մօտաւորապէս 1,2 առ հարիւրը, եւ Միացեալ Նահանգները, որ կը ծախսէ 3,4 առ հարիւրը, պէտք է այդ ցուցանիշով իրարու մօտ ըլլան», նշած է ան:

– ՄԻԱՑԵԱԼ Նահանգներու արտաքին գործոց նախարարութեան բանբեր Ճոն Քըրպի կը յայտնէ, որ իր երկրի արտաքին գործոց նախարար Ճոն Քերրի կէս ժամ տեւողութեամբ հանդիպում ունեցած է նախարարութեան աշխատակից այն դիւանագէտներուն հետ, որոնք խնդրագիրի մը ճամբով կոչ ուղղած էին, որ Միացեալ Նահանգներ յարձակում գործեն Սուրիոյ դէմ: