Հայ-ատրպէյճանական վերջին բախումներէն ետք, Միացեալ Նահանգներու հայ համայնքը կը փորձէ իր տեսակէտը լսելի դարձնել Ա.Մ.Ն.ի պաշտօնեաներուն,- կը հաղորդէ «Ամերիկայի ձայն»ը:
Ա.Մ.Ն. հայ համայնքը առցանց արշաւի սկսած է` փորձելով Ա.Մ.Ն. պետական եւ քաղաքական գործիչներուն հասցնել սեփական տեսակէտը հայ-ատրպէյճանական վերջին ողբերգական բախումներուն վերաբերեալ:
Ուաշինկթընի Հայ Դատի Յանձնախումբի գործադիր տնօրէն Արամ Համբարեան ուղղակի դիմած է սփիւռքին` յիշեցնելով, որ ատրպէյճանական կողմի յարձակումը տեղի ունեցած է քրիստոնեաներուն համար կարեւոր Ամանորի եւ Սուրբ Ծնունդի տօներուն:
Համբարեան կոչ ուղղած է ամերիկահայերուն՝ միանալու առցանց պայքարին.- «Մենք որպէս սփիւռք կը կատարենք մեր գործը, մենք կը կապուինք մեր իշխանութիւններուն հետ, որպէսզի անոնք քննադատեն եւ հետաքննեն Ատրպէյճանի գործողութիւնները»:
Ա.Մ.Ն. Հայ Դատի Յանձնախումբը կոչ ըրած է Ա.Մ.Ն.ի մէջ բնակող հայերուն անյապաղ կապ հաստատելու Ա.Մ.Ն. գործադիր եւ օրէնսդիր իշխանութեան ներկայացուցիչներու հետ՝ ընկերային ցանցերու միջոցով. «Դուք կրնաք հաղորդագրութիւն ուղարկել Քոնկրէսի անդամներուն, Սպիտակ Տուն եւ Ե.Ա.Հ.Կ. Մինսքի Խմբակի ղեկավարութեան` անոնց հասցնելով ձեր դիրքորոշումը: Twitterով կրնաք նաեւ կապուիլ նորընտիր նախագահ Թրամփի հետ:
Ա.Մ.Ն. հայ համայնքի ներկայացուցիչներուն խօսքով՝ իրենք կը փորձեն ընել այնպէս, որ ատրպէյճանական կողմին վրայ, միջազգային վարկանիշի տեսանկիւնէն, թանկ նստի հայկական կողմին դէմ յարձակումը:
Ա.Մ.Ն. հայ համայնք
Ատրպէյճանի զինուժի թափանցման փորձէն ետք՝ Ա.Մ.Ն. հայ համայնքը առցանց արշաւ սկսած է