Հ.Հ. վարչապետ Նիկոլ Փաշինեան անհասկնալի կը համարէ այն, որ որոշ քաղաքացիներ պատշաճ ձեւով չեն արձագանգեր քաղաքացիական անհնազանդութեան բոլոր ցոյցերը դադրեցնելու իր կոչին: Այս մասին ան գրած է դիմատետրի իր էջին վրայ: «Ինծի համար անհասկանալի է, որ կան քաղաքացիներ, որոնք պատշաճ ձեւով չեն արձագանգեր քաղաքացիական անհնազանդութեան բոլոր ցոյցերը դադրեցնելու եւ առկայ խնդիրներու շուրջ կառավարութեան հետ աշխատելու իմ կոչին:
«Սիրելի հայրենակիցներ, կրկին անգամ կը խնդրեմ, կը յորդորեմ եւ կը պահանջեմ` դադրեցնել քաղաքացիական անհնազանդութեան առանց բացառութեան բոլոր ցոյցերը եւ աշխատիլ կառավարութեան հետ` ձեզ յուզող հարցերը քննարկելու եւ լուծելու համար»,- նշած է Փաշինեան:
Անոր խօսքով` ժողովուրդի վստահութիւնը վայելող կառավարութեան դէմ քաղաքացիական անհնազանդութեան գործողութիւններ իրականացնելը կը նշանակէ քաղաքացիական անհնազանդութեան ցոյցեր իրականացնել իրենք իրենց դէմ կամ իրականացնել խափանանար գործողութիւններ:
«Կրկին անգամ կը խնդրեմ, կը յորդորեմ եւ կը պահանջեմ այս պահէն սկսեալ դադրեցնել քաղաքացիական անհնազանդութեան առանց բացառութեան բոլոր գործողութիւնները, եթէ ատոնք խափանարար գործողութիւններ չեն ընդդէմ ժողովուրդի վստահութիւնը վայելող կառավարութեան, հետեւաբար` ընդդէմ ժողովուրդի»,- ըսած է Հ.Հ. վարչապետը:
Ան կոչ ըրած է իր աջակիցներուն տարածելու այս ուղերձը եւ գործողութիւններ իրականացնող քաղաքացիներուն ներկայացնելու անոր բովանդակութիւնը, «ի հարկէ` սիրոյ եւ համերաշխութեան մթնոլորտի մէջ»:
ԳԼԽԱՒՈՐ ԷՋ ԼՈՒՐԵՐ Հայաստան «Կը պահանջեմ դադրեցնել քաղաքացիական անհնազանդութեան բոլոր գործողութիւնները»